UEFA rimburson tifozët e Liverpool për ngjarjet në Paris -

UEFA ka njoftuar se të gjithë 19.618 tifozët e Liverpoolit të cilët blenë bileta përmes klubit për finalen e Ligës së Kampionëve në maj të vitit të kaluar, mund të aplikojnë për kompensim, pas rrëmujës e cila e njollosi finalen e Parisit.

Më 13 shkurt UEFA u zotua se do ta hapte një “skemë të veçantë rimbursimi për tifozët” të cilët ishin të pranishëm në stadium për ndeshjen finale, si përgjigje ndaj qortimeve dhe kritikave që një raport i thirrur nga ajo i bëri rreth finales në stadiumin Stade de France.

UEFA ishte përgjegjëse për rrëmujën që gati sa nuk çoi drejt një fatkeqësie, para finales së Ligës së Kampionëve mes Liverpoolit dhe Real Madridit në maj, sipas raportit të pavarur.

Dështimet e sigurisë dhe organizimi katastrofë e shndërruan finalen në një përvojë të tmerrshme dhe traume për mijëra tifozë të Liverpoolit dhe Real Madridit.

Çmimi një bilete kushtonte përafërsisht nga 70 deri në 690 euro dhe të martën UEFA dha detaje rreth rimbursimit të biletave.

“Skema e veçantë e rimbursimit i mbulon të gjithë ata që blenë biletat përmes Liverpoolit për finale, shembull 19.618 bileta”, tha UEFA.

“Liverpoolit do t’iu kthehen paratë e plota për ato bileta dhe më pas klubi do të vazhdojë me shpërndarjen e tyre tek tifozët”, shtoi UEFA.

Çfarë kishte ndodhur pranë Stade de France?

UEFA fillimisht ia kishte lënë fajin vonesës së tifozëve për shkaktimin e telasheve, të cilat e vonuan fillimin e finales për rreth gjysmë ore.

Shumë tifozë të Liverpoolit thanë se kishin shkuar në stadium disa orë para fillimit të ndeshjes – e cila ishte caktuar të luhej në orën 21:00 – por nuk ishin lejuan të futeshin brenda.

Portat e stadiumit u hapën në orën 18:00 dhe tifozëve i ishte kërkuar të shkonin më herët për të mos shkaktuar rrëmujë.

Në portat e stadiumit ishin krijuar rreshta të gjatë të tifozëve duke pritur për t’u futur brenda. Pesë minuta para fillimit të ndeshjes, UEFA njoftoi se fillimi i finales u shty deri në orën 21:15 për arsyeje sigurie.

Dëshmitarët e rastit thanë se policia franceze përdori sprej, duke e detyruar turmën e tifozëve të tërhiqeshin mbrapa, disa prej të cilëve kishin vjell dhe kishin vrapuar për të kërkuar ujë për ta lehtësuar dhimbjen.

Në orën 21:14, UEFA njoftoi se fillimi i finales do të shtyhej sërish, deri në orën 21:36.

Ministrja e Sportit e Francës, Amelie Oudea-Castera, i kishte akuzuar tifozët se kishin tentuar të futeshin në stadium pa bileta apo me bileta të rreme. Më vonë u zbulua se kjo nuk ishte e vërtetë.