Në lidhje me problematikën e raportuar për shkarkimin e hidrovorit në Hamallaj, në zonën e Gjirit të Lalzit, Shoqëria e Ujësjellës Kanalizimeve Durrës (UKD) sqaron se në det nuk shkarkohen ujëra të ndotura.
Sipas informacionit të përcjellë, ujërat e ndotura trajtohen në Impiantin e Trajtimit të Ujërave të Ndotura, i cili funksionon 24 orë në 24. Pas procesit të trajtimit, shkarkimi kryhet sipas parametrave të përcaktuar në Përroin e Tarinit.
Sa i përket ngjyrës së errët të konstatuar në dalje të kanalit të hidrovorit, institucioni e lidh këtë fenomen me lëvizjet e baticës dhe zbaticës. Sipas tyre, këto lëvizje kanë krijuar përzierje mes ujit të detit dhe ujit të kanalit, ku gjenden baltë, llum dhe sedimente të tjera.
Autoritetet mohojnë kategorikisht praninë e shkarkimeve të tjera të ujërave të zeza në këtë kanal, duke deklaruar se të tilla shkarkime “nuk ka dhe nuk ka pasur”.
Ndërkohë, sot janë marrë mostra uji në pika të ndryshme të zonës. Rezultatet e analizave pritet të japin të dhëna konkrete mbi parametrat teknikë dhe cilësinë e ujit në dalje të kanalit të hidrovorit.
“Sot janë marrë mostra uji në të gjithë zonën dhe, në vijim, do të publikojmë parametrat teknikë të ujit në dalje të kanalit të hidrovorit”, deklaron UKD.
gijotina.com/
Discussion about this post