Në një përballje të zjarrtë që pa si Çelsin, ashtu edhe Mançester Junajtid të mbyllnin ndeshjen me nga 10 lojtarë, “Djajtë e Kuq” triumfuan 2-1 në “Old Trafford”, duke shënuar ndeshjen e 13-të radhazi pa humbje në shtëpi në kampionat kundër Bluve.
Shiu i dendur që ra në Mançester duket se shuajti shpresat e Çelsit që në minutat e para. Vetëm pas 5 minutash lojë, Robert Sançez doli në mënyrë të pamatur nga porta dhe shkaktoi faull ndaj Mbuenos, duke lënë skuadrën me 10 lojtarë.
Trajneri Enzo Mareska reagoi me një dyfishim ndërrimesh, por presioni i Junajtid ishte i pandalshëm dhe në minutën e 14-të erdhi edhe goli: Bruno Fernandes, në kufijtë e pozicionit jashtë loje, shfrytëzoi një goditje me kokë të Patrik Dorgu për të kaluar topin në rrjetë, duke shënuar golin e tij të 100-të me fanellën e Junajtid
Çelsi tentoi të rifitonte ekuilibrin dhe në minutën e 21-të Kole Palmer u zëvendësua nga Andrei Santos, por “Blutë” nuk arritën të shmangnin goditjen e dytë.
Pas një skeme nga goditja e këndit, topi mbeti në zonë dhe Luk Shou e mbajti të gjallë aksionin për Kasemiron, i cili me kokë dyfishoi avantazhin e vendasve.
Atmosfera në stadium ishte elektrizuese dhe nëntë minutat shtesë të pjesës së parë u pritën me ovacione, por Junajtid e mbylli me një problem të madh: Kasemiro mori kartonin e dytë të verdhë në minutën e 50-të, pasi kishte qenë ndëshkuar fillimisht në të 17-ën, duke e lënë skuadrën e tij me 10 lojtarë.
Shpresa e vërtetë për “Blutë” erdhi 10 minuta nga fundi, kur Xhejms harkoi bukur dhe Trevoh Çalobah që shkoi në zonë për të mposhtur me kokë portierin Altay Bayındır, duke ndezur emocionet në “Old Trafford”.
Megjithatë, përkundër tensionit dhe nervozizmit që pushtoi tribunat, Junajtid mbajti kontrollin. Fernandes iu afrua golit të tretë por u ndal nga një pritje vendimtare.
Për Çelsin kjo humbje kishte një shije të hidhur: e para në këtë sezon të Premier League, duke i lënë gjithashtu pa fitore në tre ndeshjet e fundit në të gjitha kompeticionet.
GOLAT E NDESHJES: VIDEO
Discussion about this post