Lëvizja e parë e drejtuesit të komanduar të Policisë së Shtetit duket se ka dhënë menjëherë sinjalin e një ndryshimi në strukturat e brendshme të institucionit. Sokol Bizhga ka firmosur urdhrin për pezullimin nga detyra të Ulian Shpatarakut, një prej emrave më të afërt me ish-kryepolicin Ilir Proda.
Sipas raportimeve në media, argumenti zyrtar për këtë vendim është “mosparaqitje në mënyrë të rregullt në detyrë” dhe për moszbatim të hapur të dispozitave ligjore në përmbushjen e detyrave funksionale.
Megjithatë, fakti që bëhet fjalë për një zyrtar të konsideruar si pjesë e rrethit të ngushtë të ish-drejtuesit të Policisë ka shtuar interpretimet për një riformatim të brendshëm dhe distancim nga struktura e mëparshme drejtuese.
Ulian Shpataraku ushtronte funksionin e asistentit në Departamentin për Teknologjinë e Informacionit në Policinë e Shtetit dhe ishte pjesë e kabinetit të Prodës. Gjatë kohës së tij në këtë pozicion, ai kishte përfituar disa grada, të cilat justifikoheshin me “merita të veçanta”.
Mësohet se Shpataraku është aktualisht duke ndjekur studimet master në Akademinë e Sigurisë, por dyshohet se, me argumentin e vijimit të studimeve, nuk paraqitej rregullisht në punë.
Për këtë, ka ekzistuar një urdhër i qartë nga Drejtori i Përgjithshëm që studimet master të ndiqen jashtë orarit zyrtar të punës, çka sipas Policisë përbën shkelje në rast të mosrespektimit.
gijotina.com/
Discussion about this post