Në një kohë kur ushtritë e botës testojnë raketa balistike, satelitë ushtarakë, avionë supersonikë apo dronë me inteligjencë artificiale, Shqipëria – krenaria e NATO-s në Ballkan – ka vendosur të bëjë atë që askush tjetër nuk e kishte guxuar: të kthejë një nëndetëse të Luftës së Ftohtë në… skenë koncertesh.
Po, e lexuat mirë. Në vend të manovrave ushtarake, ushtria jonë e lodhur që mezi plotëson kriteret e NATO-s, doli sot me një “armë të re sekrete”: bandën e Orkestrës së Forcave të Armatosura, që performoi këngët e grupit legjendar shqiptar “Ritfolk” mbi nëndetësen 105, një relike e Realizmit Socialist që dikur frikësonte armiqtë imagjinarë të komunizmit.
Kryeministri Edi Rama, i cili duket se e ndien veten producent artistik më shumë se drejtues i qeverisë, publikoi me krenari videon në rrjetet sociale, duke e shitur këtë si “projekt tërheqës”. Sipas tij, talenti i vajzave dhe djemve të orkestrës ushtarake na e transformon historinë e armatimit shqiptar në një festë kulture e arti.
Nga NATO tek Ritfolk – gjenerali i trombës dhe ushtari i violinës
Sigurisht, për këdo që njeh realitetin e Forcave të Armatosura shqiptare, kjo “shpikje” tingëllon si një komedi e hidhur. Shqipëria është ndër vendet më të dobëta të NATO-s, me një ushtri që mezi plotëson standardet minimale dhe që, për të arritur shifrat e kërkuara nga aleanca, është detyruar të fusë në bilancin e saj helikopterët e shëndetësisë dhe mjetet e emergjencave civile, vetëm që të dalë në raportin financiar si “në rregull”.
Pra, ndërsa ushtritë e tjera numërojnë tanke, avionë dhe anije luftarake, Shqipëria numëron ambulanca, zjarrfikëse dhe tashmë edhe… klarinetat e orkestrës.
Ironia e një skene të harruar
Në vend që nëndetësja e dikurshme e Pashalimanit të shërbente si muze i një historie të rëndë, ajo po përdoret si shtrat dekorativ për video të Instagramit. Një vend që nuk arrin dot të sigurojë rrugë për fshatrat e tij apo mjete moderne për emergjencat, sot shfaqet para botës me një ushtri që “pushton” brigjet jo me armë, por me këngët e Ritfolk-ut.
Ndoshta ky është edhe kontributi ynë unik në NATO: kur të shpërthejë lufta, ndërsa amerikanët do nisen me raketa dhe avionë F-35, shqiptarët do dalin me klarineta e kitara, duke shpresuar që armiku të dorëzohet nga nostalgjia e muzikës rok të viteve ’70.
Një koncert i shitur si arritje strategjike
Mes gjithë kësaj ironie, ajo që mbetet e qartë është se qeveria përpiqet ta shesë çdo detaj si sukses. Një koncert i thjeshtë ushtarak, që mund të ishte aktivitet kulturor lokal, shitet si inovacion i madh kombëtar. Dhe fatkeqësisht, kjo ndodh në një kohë kur shqiptarët e dinë mirë se sa e brishtë është ushtria e tyre, sa herë që vjen puna për t’u përballur me standardet e NATO-s apo me realitetin e një bote që përgatitet për sfida serioze.
Discussion about this post