Gjyqtarja e Apelit të GJKKO-së, Ilirjana Olldashi, vendosi sot të ndryshojë masën e sigurisë ndaj Jamarbër Malltezit, dhëndrit të ish-kryeministrit Sali Berisha, nga “arrest me burg” në “arrest shtëpie”.
Ndërkohë që e njëjta gjyqtare ka lënë në fuqi dy masat e sigurisë ndaj ish-Kryeministrit Berisha, atë te “detyrimit të paraqitjes” dhe “ndalim të daljes jashtë vendit”.
Ndryshimi i masës së sigurisë ndaj Malltezit u prit si një “rrufe në qiell të hapur”, madje u interpretua si një standard i dyfishtë i vendosur nga gjyqtarja, duke bërë krahasime me raste të mëparshme, të shpallura nga Apeli i GJKKO-së.
Por burime nga GJKKO bëjnë të ditur se një nga arsyet kryesore që duket se ka detyruar gjyqtaren të ndryshojë masën e sigurisë është gjëndja shëndetësore e vajzës së Malltezit.
Nga burimet mësohet se vajza e tij është në gjendje të rënduar shëndetësore, çka duket se ka sjellë edhe ndryshimin e masës së sigurisë nga arrest me burg në arrest shtëpie.
Burimet tregohen të rezervuara lidhur me këtë detaj, ndërsa seanca ndaj Malltezit nisi paraditen e djeshme, zgjati për disa orë, dhe pasdite u vendos që vendimi të shpallej paraditen e sotme.
Malltezi u arrestua rreth 1 muaj më parë teksa ndodhej në mjediset e jashtme të aeroportit “Nënë Tereza”, duke pritur bashkëshorten e tij, Argita Malltezi, që kthehej nga një udhëtim jashtë vendit. Malltezi u ndalua nga forcat operacionale në kushte të pashpjeguara, lidhur me mënyrën se si vepruan, ndërsa gjyqtarja e GJKKO Irena Gjoka, me kërkesë të prokurorëve të SPAK, Enkelejda Millonai dhe Arben Kraja, kishin kërkuar masën e sigurisë “arrest me burg”.
Discussion about this post