Gjykata Kushtetuese rrëzoi kërkesat që pretendonin jokushtetuetshmërinë e zgjedhjeve lokale të 2019, duke i shpallur ato legjitime, por për konstitucionalistin Kristaq Kume ajo nuk bëri asgjë tjetër veçse ktheu në vendim të saj opinionin e Komisionit të Venecias.
Në lidhje me vakancat në 6 bashki, që ende janë pa kryetar, Kume shprehet se është Këshilli i Ministrave që duhet të njoftojë presidentin mbi vakancat dhe ky i fundit ka 48 orë kohë për t’i dekretuar ato. Pavarësisht se PS është shprehur e gatshme për zhvillimin e zgjedhjeve në këto bashki, Meta deri më sot ka refuzuar të dekretojë një datë.
“Pasi vendimi i Gjykatës Kushtetuese botohet në Fletoren Zyrtare, duhet që organet përkatëse duhet të njoftojnë Presidentin për këtë gjë. Kur vakanca krijohet nga ndërprerja e mandatit siç është pjesa më e madhe përveç Rrogozhinës, është Këshilli i Ministrave që njofton Presidentin dhe ky i fundit duhet të dekretojë zgjedhë për vendin e mbetur vakant brenda 48 orëve. Kjo është rruga që ndiqet. Nëse Presidenti e ankimon në gjykatë ndërkombëtare vendimin e Kushtetueses, çështja ngrin, nuk vazhdojnë më tej proceset”, u shpreh Kume.
Bashkitë pa kryetar janë: Shkodra, Durrësi, Vora, Dibra, Rrogozhina dhe Lushnja. Kujtojmë se më 4 nëntor, pas gati 2 vite e gjysmë sagë të zgjedhjeve lokale të qershorit të vitit 2019, Gjykata Kushtetuese vendosi rrëzimin e kërkesave që pretendonin jo kushtetutshmëri e zgjedhjeve.
Discussion about this post