Në javën e parë të nisjes së vitit të ri akademik në universitetet e kryeqytetit masat e kontrollit nuk janë si ditën e parë. Duket se studentët mjafton të kenë maskën, ndërsa dokumentet shëndetësore, kontrollohen me raste. Lidhur me këtë çështje ka folur sot gjatë një interviste televizive ish-drejtori i kurrikulave të Rektoratit të Tiranës, Albano Zhapaj, i cili tha universitetet janë bërë vartëse të Ministrisë së Arsimit, duke vetëmohuar autonominë e tyre.
“Nuk ndryshohen rregullat në mes të lojës. Nuk mund t’u thuash studentëve 2 ditë para o ejani me vaksinë ose mos hyni. Universitetet janë në gjumë, pa plan veprimi dhe shkaktar është shteti. Ka dy vite që janë bërë zgjedhjet në universitete dhe duket se nuk duan t’i prishin raportet me ministrinë dhe presin vendimet e tyre”, shprehet Albano Zhapaj.
Ndërsa në lidhje me vendosjen e policëve në hyrje të universiteteve, Zhapaj tha se nuk është legjitime. Sakaq, ai sugjeroi që universitet të konsultohen me ekspertë në lidhje me masat që ndërmarrin. “Universitetet funksionojnë sepse ka studentë, nëse nuk ka studentë atëherë roli i tyre mbetet nul. Policët te dera nuk kanë kompetencë për ato veprime sepse nuk po kontrollojnë gjoba makinash, në universitet duhen ekspertë të shëndetësisë për kontrolle”, tha ai.
Të hënën kur startoi viti i ri akademik në disa fakultete në Tiranë dhe jo vetëm pati përplasje dhe kaos mes studentëve që nuk ishin të vaksinuar dhe policëve që qëndronin tek dyert. Ndërsa ka pasur edhe universitete që kanë lejuar hyrjen në auditorë për të gjithë studentët.
