Kryeministri Edi Rama, ministrja e Shëndetësisë Ogerta Manastirliu dhe shefja e Departamentit të Epidemiologjisë pranë ISHP-së, Silva Bino kanë vizituar qendrën shëndetësore Nr.1 në Tiranë.
Gjatë fjalës së tij, Rama përsëriti dhe njëherë thirrjen për vaksinim, teksa u tregua i prerë me studentët apo pedagogët, se kush nuk vaksinohet, nuk mund të futet në auditor.
“Ama, në momentin që infektohesh të mbron nga rreziku për jetën, mosvaksinimi të çon deri në vdekje. Tjetra është që studentët që nuk vaksinohen nuk do hynë në auditor. Nuk ka mundësi që pjesa që do të mbrohet të rrezikohet nga ata që jetojnë me teori. Askush nuk i merr dot me forcë, por në mjedise kur janë të tjerët janë të detyruar të vaksinohen. E njëjta vlen dhe për mësuesit, në administratë, nuk ta ka borxh marrëzinë në raport me realitetin. Mirë është të vaksinohesh.”
Rama u shpreh po ashtu se nëse Shqipëria sot nuk ka shifra të larta të vdekjeve, kjo ka ardhur sipas tij, falë nisjes në fazë të hershme të procesit të vaksinimit masiv.
“Nëse Shqipëria ka sot stabilitet vjen si rezultat i vaksinimit. Kemi bërë shumë shpejt procesin, kemi shtrirë shumë shpejt vaksinimin masiv, nëse s’do kishim pasur sukses sot do ishim duke numëruar dhjetëra të vdekur në ditë. Ne nuk mund të hyjmë në situata të rrezikshme që thonë jo Bill Gates, jo George Soros. Të tjerët të vazhdojnë të bëjnë mësim online si të duan, të marrin përsipër kostot. Po kjo nuk mund të jetë luftë me mullinjtë e erës”, tha Rama.
