Gjashtë persona kanë rënë në prangat e policisë në Tiranë, pas një operacioni blic të zhvilluar ditën e sotme 3 prej tyre punonjës të OSHEE-së, si dhe shpallen në kërkim dy të tjerë. Burime nga policia për gijotina.com bëjnë me dije se është arrestuar një 27 vjeçar i identifikuar me iniciale M. K., banues në Tiranë, i dënuar më parë, i dyshuar për veprën penale “Vjedhje e energjisë elektrike kryer në bashkëpunim” dhe “Trafikimi i armëve dhe municioneve”.
Po ashtu policia ka vënë në pranga personin e identifikuar me iniciale B. B., 39 vjeç, banues në Tiranë, për veprat penale “Vjedhje e energjisë elektrike kryer në bashkëpunim” dhe “Ndërtim i paligjshëm”; E. M., 42 vjeç, banues në Tiranë, për veprën penale “Moskallëzimi i krimit”.
Policia gjithashtu njofton se janë arrestuar edhe personat e identifikuar me iniciale:
– E. D., 43 vjeç, banues në Tiranë, me detyrë shef grupi Operativ OSHEE;
– A. Sh., 41 vjeç, banues në Tiranë me detyrë Shef grupi Operativ OSHEE;
– P. D., 45 vjeç, banues në Tiranë, me detyrë Shef Ekipi Operativ OSHEE. Të tre të dyshuar për veprën penale “Shpërdorimi i detyrës”.
Ndërkohë, u shpallën në kërkim policor:
– E. K., 32 vjeç, i dyshuar për veprat penale “Prodhimi dhe shitja e narkotikëve” dhe “Vjedhja e energjisë elektrike”;
– H.K., 65 vjeç, i dyshuar për veprën penale “Vjedhja e energjisë elektrike”.
Gjatë kontrollit në banesat e të arrestuarve E.K., dhe M.K., janë gjetur disa sende të kundraligjshme si peshore që shërbente për shpërndarjen e lëndës narkotike dhe municion luftarak.
Njëkohësisht në banesën e B. B., u konstatua se po kryente një ndërtim të paligjshëm.
Gjatë kontrollit të kryer në një ambient bodrum, në pjesën e pasme të ndërtesës së pallatit ku ndodheshin apartamentet e shtetasve të lartpërmendur, u konstatua një lidhje e paligjshme energjie elektrike, e cila nëpërmjet një kabulli kalonte në drejtim të banesës ku banonin M. K., dhe B. B.
Këta të fundit sipas njoftimit nga policia kanë bashkëpunuar në vjedhjen e energjisë elektrike me të personat e shpallur në kërkim E.K.,dhe H.K., ndërsa personi i identifikuar me iniciale E. M., ka pasur dijeni mbi vjedhjen e energjisë elektrike dhe nuk e ka kallëzuar në organet ligjzbatuese.
Ndërkohë, nga hetimet rezultoi se lidhur me rastin e vjedhjes së energjisë elektrike, kanë shpërdoruar detyrën punonjësit e OSHEE-së E. D., A. S., dhe P. D., me detyrë shef grupi operativ në zona të ndryshme të qytetit të Tiranës.
Discussion about this post