Ish-kreu i Bashkisë së Durrësit Vangjush Dako është marrë në pyetje mbrëmë nga zyrtarë të BKH-së. Dako është edhe pjesë e listës së zezë të emrave të hartuar nga Shtetet e Bashkuara të Amerikës.
Në ambientet e BKH-së, Dako është marrë në pyetje për disa orë. Por, gjatë ditës së sotme, mësohet se ish numri një i Bashkisë Durrës është liruar pas intervistimit.
Emri i Vangjush Dakos është lakuar së tepërmi, si i dyshuar për vepra të ndryshme penale.
DASH ka shpjeguar më herët për mediat se Dako “dyshohet si i përfshirë në vepra madhore të korrupsionit, në kohën që drejtonte Bashkinë Durrës”. Vetë Dako ka mohuar akuzat.
Ish-kryebashkiaku është një prej ish-zyrtarëve të lartë të shpallur “non grata” nga Shtetet e Bashkuara të Amerikës, bashkë me ish-kryeministrin Sali Berisha, ish-deputetin Tom Doshi dhe ish-kryeprokurorin Adriatik Lalla.
Discussion about this post