Varka me emigrantë përmbyset në Kanalin Anglez, humb jetën 7 vjeçarja

Një vajzë 7-vjeçare humbi jetën pasi një varkë e vogël që po përpiqej të arrinte në Kanalin Anglez u përmbys në Francën veriore.

Varka kishte në bord 16 emigrantë, ndërsa u përmbys disa kilometra larg brigjeve të Dunkirk.

Varka “nuk kishte përmasat e duhura për të transportuar kaq shumë njerëz”, tha autoriteti lokal në një deklaratë. Ai shtoi se prindërit e vajzës, të cilët po udhëtonin me tre fëmijë të tjerë, u dërguan në një spital në Dunkirk.

Autoriteti lokal Préfet du Nord tha se policia dhe zjarrfikësit u lajmëruan për varkën e përmbysur nga një këmbësor.

“Një çift, origjina e të cilëve është duke u përcaktuar, me katër fëmijët e tyre, përfshirë nënën që është shtatzënë, ishin në bord”, thuhet në deklaratën e Préfet du Nord, duke sqaruar se “vajza e vogël e çiftit, 7 vjeçe, vdiq nga mbytja”.

Préfet du Nord tha se dy burra dhe gjashtë fëmijë të vegjël u dërguan në spital, por gjendja e tyre nuk ishte kërcënuese për jetën.

Prokurorët në Dunkirk thanë gjithashtu se “disa persona janë në paraburgim” për incidentin, raportoi agjencia e lajmeve AFP.

Kjo ngjarje vjen pasi tre emigrantë vdiqën të mërkurën duke u përpjekur të kalonin Kanalin Anglez, pasi varka e tyre u gjend në vështirësi.