Prokuroria Vlorë ka kërkuar në gjykatë dënimin me 15 vite burg për veprën penale “vrasje me dashje” për ish-policin Arjan Tase, i cili përplasi për vdekje me skaf një të mitur, katër vite më parë në Potam.
7-vjeçarja Jonada A. ndërroi jetë menjëherë në vendngjarje, një ngjarje që shkaktoi zemëratë në opinionin publik.
Ngjarja
Në konkluzionet përfundimtare, Prokuroria deklaron se “provohet që ditën e ngjarjes – në datën 02.08.2022, rezulton se i pandehuri Arjan Tase ka qënë në drejtimin e një mjeti lundrues me dy motorrë dhe pasi ka lënë disa persona në breg të detit, në momentin që është nisur për të dalë nga zona ku notonte shtetasi B.A. me vajzën e tij Jonada A, mjeti ka marrë shumë shpejtësi duke shkuar në drejtim të tyre dhe në marrjen e kthesës motorrat e tij kanë kapur vajzën e mitur duke e prerë në të gjithë trupin. E mitura ndërroi jetë në moment”.
Në lidhje me të pandehurin, nga analiza e akteve të administruara gjatë hetimit, kqyrja e vendit të ngjarjes, e pamjeve filmike, provohet të ketë konsumuar elementët e veprës penale të “Vrasje me dashje” parashikuar nga neni 76 i Kodit Penal në formën e dashjes indirekte, njofton prokuroria.
Organi i akuzës shpreh bindjen se i pandehuri Arjan Tase ka konsumuar elementët e veprës penale ‘Vrasja me dashje’, pavarësisht pretendimeve të mbrojtjes, në lidhje me kualifikimin e faktit penal si ‘Vrasja nga pakujdesia’.
Discussion about this post