Katër turistët rusë Sergei Burenkova, 60 vjeç, Nataliia Burenkova, 58 vjeçe, Ekaterina Burenkova, 31 vjeçe dhe partneri i saj Nikita Belousov, 37 vjeç kanë vdekur nga helmimi. Në këtë përfundim ka dalë Ekspertiza e Mjekësisë Ligjore, por ende mbetet mister lënda që e ka shkaktuar këtë helmim të rëndë që solli vdekjen e katër rusëve.
Nga ana tjetër, Prokuroria e Kavajës ka kërkuar ndihmë nga një laborator privat në Shqipëri për të analizuar ujin e pishinës dimërore ku po relaksoheshin turistët rusë.
Trupat e tyre janë tërhequr nga djali i vetëm i familjes Aleksandër Burenkov. Ambasada ruse në Shqipëri ka bërë me dije se trupat e tyre do tu nënshtrohen një tjetër ekspertize për të krahasuar rezultatet e saj me atë të Shqipërisë.
Ndërkohë më parë, Ministria e Drejtësisë ika kërkuar nga mjekësia ligjore informacion të përshpejtuar mbi shkaqet e vdekjes së 4 turistëve rusë në një hotel në Qerret të Kavajës. Ende nuk dihet nëse kjo bëhet për shkak të përgjigjeve negative të njëpasnjëshme nga ana e institucioneve, të cilat duhet të bënin ekzaminimet e provave apo nëse ka një kërkesë të tillë nga Moska zyrtare. Më parë Ambasada Ruse në Shqipëri ka bërë me dije sepse një ekspertizë shtesë mund të kryhet mbi trupat e pajetë për të mësuar mbi shkaqet e vdekjes së tyre, ndërsa shpresonin në marrjen sa më të shpejtë të përfundimeve zyrtare nga pala shqiptare, përfundime të cilat ende nuk po vijnë.
Nga ana tjetër, Instituti i Shëndetit Publik nuk ka konstatuar asnjë anomali në ujin e dërguar për ekspertim ndonëse nuk ka kthyer ende një përgjigje zyrtare, ndërsa për pjesët e peskavicave, Instituti i Sigurisë Ushqimore u shpreh se, nuk mund të ndihmojë dot në hetime pasi nuk është në kompetencën e tyre ligjore. Kur ka kaluar më shumë se një javë nga ngjarja e rëndë një seri institucionesh kthyen përgjigje negative mbi ekspertimet, ndërsa përkthimi i marrjes në pyetje të dëshmitarëve u bë nga një përkthyes jo i licencuar nga ana e ministrisë së drejtësisë, e cila tashmë kërkon përgjigje të rezultateve.
