Kristi Balukja është i riu i cili humbi jetën këtë të martë si pasojë e një shpërthimi të ndodhur rreth orës 04:10, në lagjen “Shënkoll”, Elbasan. Sipas një rindërtimi paraprak të ngjarjes, Balukja i vuri lëndë plasëse një automjeti në pronësi të Renato Çepës, me të cilin kishte konflikte të mëparshme. Por, eksplozivi ka shpërthyer gjatë montimit dhe Balukja mbeti i plagosur rëndë. I riu u transportua në spital, por nuk mundi të mbijetojë.
“Në vijim të informacionit të dhënë mëngjesin e sotëm, ku si pasojë e shpërthimit të lëndës eksplozive, gjatë vënies së saj, në automjetin tip ‘Volkswagen’ në pronësi të shtetasit Renato Çepa, në lagjen ‘Shënkoll’, ishte dëmtuar autori, i cili humbi jetën në spital, ju informojmë se pas verifikimeve të kryera, është identifikuar ky shtetas, konkretisht Kristi Balukja, 25 vjeç, banues në Elbasan. Nga hetimet e deritanishme ka rezultuar se 25-vjeçari, për shkak të një konflikti të vjetër, për motive të dobëta, mëngjesin e sotëm, ka vënë lëndë eksplozive në automjetin e shtetasit Renato Çepa”, njoftoi policia.
Lënda eksplozive, shtuan të njëjtat burime, ka shpërthyer gjatë vënies dhe si pasojë 25-vjeçari ka humbur jetën, në spital.
“Një grup i posaçëm hetimor, i përbërë nga strukturat hetimore të DVP Elbasan dhe të Komisariatit të Policisë Elbasan, si dhe nga ekspertë të Departamentit të Policisë Kriminale në DPPSH, në drejtimin e Prokurorisë, vijon punën për të zbardhur të gjitha rrethanat e këtij rasti”, mbyllet njoftimi i bluve.
Renato Çepa njihet në Elbasan dhe si “Kel Llumi” dhe rezulton person me precedentë penalë në fushën e lëndëve narkotike.
Po kështu, 40-vjeçari rezulton i skeduar nga policia për lidhje me të ndjerin Emiljano Ramazani, i vrarë katër vite më parë si edhe me personazhe të tjera të botës së krimit.
Discussion about this post