Drejtoria e Përgjithshme e Rrugëve dhe Ndriçimit Publik Tiranë do të shpenzojë 300 milionë lekë për të blerë kapak pusetash. Ky prokurim i ndërmarrjes që varet nga kryebashkiaku Veliaj nuk ka pyetur për mungesë konkurrence por ka gostitur “klientin” e pushtetit. Bëhet fjalë për prokurimin me numër reference REF-39133-08-17-2022 dhe objekt “Blerje zgara dhe puseta”. Tenderi është mbyllur me datë 12 shtator dhe fituesi është shpallur me 11 tetor. Vetëm dy kompani kanë shfaqur interes, konkretisht “POWER INDUSTRIES” sh.p.k dhe
“SAHORA” shpk”. Ky i fundit është skualifikuar menjëherë me argumentin se “nuk ka paraqitur autorizim prodhuesi, katalog apo skedë teknike, fletë analize apo raport testimi për produktet e kërkuara, mostra të produkteve dhe mjetet që ka në dispozicion”. Kështu në garë mbeti vetëm “POWER INDUSTRIES” sh.p.k.
“POWER INDUSTRIES” sh.p.k administrohet aktualisht nga Andi Marku, por themeluesit e mëparshëm janë Olta Xhaferi dhe Maksim Shena. Kështu, kompania kanë rrëmbyer tenderin 300 milionë lekë nga Drejtoria e Përgjithshme e Rrugëve dhe Ndriçimit Publik Tiranë, institucion në varësi të Bashkisë Tiranë. Pra, ka qenë Veliaj ai që ka vulosur dhënien e këtij tenderi pa garë te klientët e tij. Për këto shkelje dhe abuzime, ky tender është shënuar me “Flamur të kuq” nga monitoruesi Open Data.
Kush është “POWER INDUSTRIES”
“POWER INDUSTRIES” sh.p.k është e njohur për përfshirjen në skandalin e një viti më parë, kur Rama i xhiroi kësaj firme 35 mijë dollarë për të riparuar makinën e tij të blinduar. Po flasim për tenderin me objekt “Riparim i automjetit blind” i zhvilluar nga Drejtoria e Shërbimeve Qeveritare, një strukturë kjo që kujdeset për rehatinë dhe luksin e pushtetarëve. Pjesa më e madhe e parave u investuan tek gomat e makinës së blinduar, të cilat duhet të ishin të cilësisë më të lartë, duke ofruar siguri maksimale për Ramën. Në garë për riparimin e makinës së blinduar qeveritare kanë marrë pjesë Bushi-Servis, Alstezo dhe Kadiu, të cilat kanë paraqitur oferta më të ulëta. Por, fituese u shpall “Power Industries”, me ofertën më të lartë.
Maksim Shena dhe Olta Xhaferi kanë qenë pjesë e klientelës së Erion Veliajt, pasi tenderët më të shumtë i kanë marrë nga Bashkia Tiranë, por lidhjet e tyre shtrihen edhe në disa bashki të tjera. Në 2020, PD akuzonte Ramën përmes Gazmend Bardhit se lëvizte me makinë të blinduar. Rama u përgjigj duke thënë se makina nuk ishte e blinduar dhe se ia kishte sjellë vëllai nga SHBA që në vitin 2009. Megjithatë, Rama nuk e ka deklaruar në ILDKPKI këtë makinë që pretendon se ia ka sjellë vëllai nga SHBA.
Nga të dhënat e marra nga Agjencia e Prokurimeve Publike rezulton se Maksim Shena dhe Olta Xhaferi kanë marrë vitet e fundit rreth 150 tenderë, shumica në mënyrë të dyshimtë dhe shpesh herë pa garë fare. Kompania në vitin 2018 ka kaluar aksionet në pronësi të administratorit duke “humbur gjurmët” e krijuesve të saj.
I njëjti tender çdo vit
Me sa duket Bashkia Tiranë blen çdo vit zgara dhe puseta. Jo larg, por në dhjetor të vitit 2021, Bashkia Tiranë ka hapur tender 350 milionë lekë me objekt “Blerje zgarash dhe pusetash”. Edhe këtë prokurim e ka fituar pa garë “Power Industries”. Nga dokumentacioni i disponuar, vihet re se në procedurë kanë marrë pjesë vetëm dy kompani, përkatësisht “POWER INDUSTRIES” me ofertë 28.962.200 lekë të reja (pa TVSH) dhe “MAG UTILITIES” me ofertë zero. Çka do të thotë se kjo kompani është futur në mënyrë fiktive në garë. Kështu, fituesi i paracaktuar ka qenë “Power Industries”. Dhe, për më tepër, brenda 10 muajve, kjo kompani ka xhiruar 650 milionë lekë për kapakë pusetash, të firmosura nga Erion Veliaj.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post