Dosja e tenderit të fundit të Erion Veliajt është e gatshme për SPAK. Punime për së dyti, në të njëjtin vend janë dëshmi e fortë që Veliaj zhvillon tendera për fasadë, kurse paratë po i ndan me biznesmenë që i ka në listën e ngushtë të bashkëpunëtorëve në afera.
I tillë është rasti me Tregun Çam, për të cilin së fundmi Bashkia Tiranë ka zhvilluar tenderin me objekt ‘Rikualifikimi i bllokut te tregu Çam’ dhe i ka vënë në dispozicion 1.2 milionë euro.
Tirana ka plot zona ku mund të investohej ky fond, por tregu i mësipërm është i rregullt si kukull dhe nuk ka nevojë për asfalt.
Po pse kaq shumë lekë për të riparuar këto tre rrugica që lidhin tregun? Infrastruktura rrugore në këtë Njësi Administrative rezulton që ka shtresa asfaltike, ekziston ndriçimi publik, kuz dhe kub. Ndoshta një auditim i KLSH më vonë do ta zbulojë se si e ka llogaritur Veliaj fondin limit që i doli 1.2 milionë euro, por tani e dimë se ku po shkojnë këto para.
Punë për së dyti
Tani ne kemi një pyetje, pse mungojë rrjetet inxhinierike dhe i si u dëmtua asfalti në këto rrugica ku nuk kalojnë mjete të rënda, të cilat janë rikonstruktuar vetëm 7 vite më parë?
Kujtojmë se në vitin 2016, kryebashkiaku Erion Veliaj doli në media dhe bëri propagandë se ka rregulluar 3 rrugicat e Tregu Çam dhe u vendosi një stend që ndihmonte bizneset që shesin aty.
“2 rrugë në zonën e tregut “Çam” janë rikonstruktuar nga Bashkia e Tiranës. Në këtë zonë ky institucion ka parashikuar jo vetëm rikualifikime urbane, por edhe kthimin e tregut “Çam” në Pedonale. Kjo do të thotë se banorët dhe tregtarët mund të shfrytëzojnë lirisht hapësirë dedikuar atyre pas shmangieve të lëvizjeve të automjeteve.
Bashkia e Tiranës ka përfunduar rikonstruksionin e rrugëve “Shyqyri Bërxolli” dhe “Reshit Çollaku” duke i dhënë mundësi banorëve pranë zonës së tregut “Çam” të shfrytëzojnë infrastrukturë të përmirësuar dhe me standarde europiane”, u shpreh Veliaj në vitin 2016.
Ose paratë e tenderit të vitit 2016 janë përvetësuar, ose rruga është ndërtuar shkel e shko sipas standardeve të Lali Erit.
Kujt po i jepen paratë?
Tenderi është vlerësuar me “Flamur të Kuq” nga Open Data Albania për riskun e korrupsionit. Veliaj e ka hapur garën për këtë tender qysh në 18 qershor 2024 dhe e ka mbyllur më 3 korrik. Po në të njëjtën ditë është mbajtur gara, megjithatë kontrata është vonuar dhe është bërë publike më datë 22 tetor 2024.
Nuk mund të themi me saktësi përse Veliaj e mbajti kaq gjatë në sirtar kontratën, por mund të tregojmë shkeljet në këtë tender, të cilat nuk mund të mbulohen. Në fakt 16 kompani kanë shfaqur interes për këtë tender, mjaftueshëm për një konkurrencë të vërtetë.
Por Veliaj i ka skualifikuar 15 ofertat më të ulëta që në fazën e parë.
Për 9 prej tyre ka dhënë si argument mungesën e dokumentacioneve, gjë e cila mund të zgjidhej sipas ligjit, por komisioni i Lali Erit ka ndjekur porosinë. Ndërsa për 6 ofertat e tjera nuk është dhënë asnjë shpjegim, edhe pse kishin propozime më ekonomike se firma fituese që është “MELA”, në pronësi të Mehdi Lalës.
Ky biznesmen pa u stresuar futi në xhep këtë kontratë dhe ka 12 muaj kohë të hedhë asfalt në 3 rrugicat që listohen për rehabilitim.
“Mela” është kliente e Veliajt në tendera të shtrenjtë. Vitin e kaluar Mehdi Lala mori nga Veliaj 1.6 miliard lekë për të riparuar 4 rrugica. Është fjala për tenderin me objekt “Rehabilitimi i rrugëve të Bllokut që kufizohet nga rrugët “Fabrika e Qelqit”, “Konferenca e Pezës”, “Besim Alla”, dhe “Jorgo Panajot”.
Këto segmente ishin të rregulluara dhe asfaltuara në vitin 2018, por pa kaluar 4 vjet, bashkia i shqepi sërish për t’i dhënë këto lekë Mehdi Lalës. Sipas të dhënave zyrtare, për këtë tender kanë shfaqur interes 15 kompani. Të gjitha janë përjashtuar dhe në garë ka mbetur firma e paraqitur nga Lala, i cili ka garuar si bashkim operatorësh me dy firmat e tij ALB-Shpresa dhe “Mela”.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post