Erion Veliaj do të mbetet në burg, Gjykata e Lartë rrëzon rekursin e kryebashkiakut të Tiranës

Erion Veliaj do të vazhdojë të qëndrojë në qeli. Ky është vendi i Kolegjit Penal të Gjykatës së Lartë, i marrë sot më datë 15 shtator.

Ky vendim u mor pas shqyrtimit të dosjes penale, ku kërkues ishte Erion Veliaj, i cili kundërshtonte masën e sigurisë “arrest me burg”.

Në kërkesën e tij, Veliaj kishte kërkuar shfuqizimin e një sërë vendimesh të Gjykatës së Posaçme të Shkallës së Parë, Apelit të Posaçëm dhe më herët të Kolegjit Penal të Gjykatës së Lartë.

Çështja ishte rikthyer për shqyrtim pas një vendimi të Gjykatës Kushtetuese, e cila kishte kërkuar që Gjykata e Lartë të arsyetonte më tej nëse masa “arrest në burg” ishte proporcionale në raport me rrethanat e çështjes dhe statusin e Veliajt si kryetar i zgjedhur i Bashkisë së Tiranës.

Veliaj ndodhet në paraburgim që prej 10 shkurtit 2025, ndërsa ndaj tij SPAK ka ngritur një sërë akuzash, të cilat ai dhe mbrojtja e tij i kundërshtojnë. Sipas raportimeve të fundit, dosja ndaj tij përfshin 13 akuza, ndërsa procesi penal vijon në GJKKO.

Ndërkohë mbrojtja e Veliajt ka argumentuar se vazhdimi i masës së arrestit cenon edhe ushtrimin e mandatit të tij si kryetar bashkie. Avokatët e tij kanë paralajmëruar gjithashtu një ankimim në Gjykatën Evropiane për të Drejtat e Njeriut në Strasburg, lidhur me masën e sigurisë dhe aspekte të tjera të procesit.

Me vendimin e sotëm, Gjykata e Lartë ka konfirmuar vijimin e masës së sigurisë “arrest në burg” ndaj Erion Veliajt.

Vendimi:

Kolegji Penal i Gjykatës së Lartë, i mbledhur në datë 15 shtator 2026, në Dhomë Këshillimi, mori në shqyrtim dosjen penale me palë: Kërkues: Erion Veliaj, Palë e Interesuar: Prokuroria e Posacme kundër Korrupsionit dhe Krimit të Organizuar dhe objekt: Shfuqizimin e vendimeve nr. 7, dt. 09.02.2025, te Gjykates se Posacme te Shkalles se Pare per Korrupsionin dhe Krimin e Organizuar, vleftesuar permes vendimit nr. 14, dt. 12.02.2025, te Gjykates se Posacme te Shkalles se Pare per Korrupsionin dhe Krimin e Organizuar; nr. 13, dt. 13.03.2025, te Gjykates se Posacme te Apelit per Korrupsionin dhe Krimin e Organizuar; nr. 00-2025-1153 (176), dt. 08.07.2025, te Kolegjit Penal te Gjykates se Larte. Shpenzimet gjyqesore ne ngarkim te subjektit te interesuar.

Pasi shqyrtoi çështjen, Kolegji, bazuar në nenin 441, pika 1, shkronja “e” të Kodit të Procedurës Penale, vendosi: Lënien në fuqi të Vendimit nr.13 (87-2025-85), datë 13.03.2025 të Gjykatës së Posaçme të Apelit për Korrupsionin dhe Krimin e Organizuar.