Duke parë se si u veprua me figurat e rëndësishme brenda Partisë Socialiste, ku shumicën prej tyre Rama i la pa poste të rëndësishme në qeveri, kryebashkiaku i Tiranës siç duket i ka hipur frika se mos ka të njëjtin fat dhe ai.
Për këtë, Veliaj ka filluar daljet në media duke shprehur se do ta pranonte me kënaqësi një mandat të tretë si kryebashkiak i Tiranës.
Në përgjigjet e tij nuk mungojnë edhe fjalët lavdëruese për punët që bën dhe për marrëdhënien që ka me kryeministrin Rama. Ai thotë se që tani po mendon se çfarë duhet të bëhet në një mandat të tretë teksa thekson se me Edi Ramën ka një raport shumë special dhe se në zgjedhjet e fundit u afruan edhe më shumë. Ndërkohë sipas tij, shpresa e fundit e opozitës është që ai dhe Rama të kenë konflikt që Tirana të rikthehet në epokën e gjumit.
“Nëse Partia Socialiste ma jep besimin dhe tashmë kam filluar të mendoj se çfarë mund të jenë gjërat që mund të bëjmë në një mandat të tretë, do ta bëja me shumë pasion dhe me shumë kënaqësi si këto dy mandate. Nuk e di se çfarë thonë njerëzit. Ndonjëherë është mirë që vij në emisione se marr dhe jehonën e muhabeteve të Tiranës. Nuk e di a kanë dy njerëz në politikë një raport më special seç kam unë me Edi Ramën. E kam përdorur mish e thua herën e fundit, në këto zgjedhje u afruam dhe më shumë. Kishim kontakt akoma më të shpeshtë për shumë vendime që duhet të merrnim, strategjia na funksionoj. Ne shkuam nga 200 mijë në 227 mijë vota në Tiranë në mandatin e tretë. Pra jemi rritur 13% mbi peshën tonë. Në mandatin e tretë ishte rezultat shumë i kënaqshëm. Nëse siç Saliu mundohej me diversionin shpresa e tyre e fundit është që unë dhe Edi Rama të kemi një konflikt që të kthehet epoka e gjumit në Tiranë janë të pashpresë” – është shprehur Veliaj.
Kujtojmë që kryeministri Edi Rama zhgënjehu shumë figura brenda PS, duke i lënë pa poste te larta dhe disa prej tyre janë Taulant Balla, Damian Gjiknuri, Ilir Beqaj, Fatmir Xhafaj. Pavarësisht se çfarë shpreh, siç duket kreu i Bashkisë së Tiranës i druhet një anashkalimi nga kryeministri Edi Rama.
