Uzina “Enver”, është viktima e radhës së betonizimit të Tiranës. Në fshehtësi, pa transparencë, pa asnjë tabelë informuese, Bashkia e Tiranës dhe kompania e ndërtimit “Arlis”, kanë tjetërsuar pronën publike. Asnjë proces ligjor, si tenderi apo ankandi, asnjë arsye ligjore, vetëm një aksion me fadroma, ka mjaftuar që në një pronë publike të jepet për ndërtim.
Në hyrje ka një letër e cila njofton se në një cep të pallatit të sapondërtuar, pak më larg, nga e njëjta kompani, janë zhvendosur zyrat publike. IMT, Policia Bashkiake, QKB dhe zyrat e njësisë 7, shërbenin në atë godinë publike. Tani do të shërbejnë nëpër godina të tjera, njësia 7 në godinën e privatit, në atë godinë, që prishi lulishten e zonës së ish-Parkut të autobusave, për ta betonizuar.
Rezultati është ky që duket, bizneset e ish-ministrave, bashkëpunëtorë të Veliajt, që zënë pronën shtetërore pa procedurë, në shkelje të plotë të ligjit, betonizim, pluhur, ndërtim kapanonesh – geto dhe në fund, edhe strehim të zyrave shtetërore tek private.
Ky është rasti unik që zyrat publike strehohen në një godinë private. Ka ndodhur më parë me kompanitë publike që janë Shoqëri Aksionere dhe funksionojnë si biznese të pavarura, por kurrë me një zyrë publike që ofron shërbime për qytetarët. Një zyrë që duhet t’i trajtojë njësoj, edhe pronarin e kompanisë “Arlis” ku po strehohet, edhe konkurrentin e tij, që duhet të falet tek ai.
Ndër të tjera këtë mund ta konsiderojmë si një precedent të frikshëm. Pasi dhuroi pasuritë shtetërore dhe pronat e ligjshme të pronarëve nëpër duar biznesesh të bashkëpunëtorëve të tij, Erjon Veliaj tani po strehon zyrat e bashkisë në privat. Këtë mund ta bëjë nesër edhe me godinën qendrore të Bashkisë, këtë mund ta bëjë me çdo institucion shtetëror, për ta përdhosur përfundimisht Shtetin.
Discussion about this post