Veliaj shtron me florinj Thesarin, dy tendera marramendës në një ditë

Bashkia Tiranë dukshëm nuk ka në planë të ndalojë me dhënien e tenderave me shuma marramendëse për investime që nuk do të konsumonin as gjysmën e shifrës së fondit limit.

Këtë herë Erion Veliaj ka akorduar dy tendera me objekt ndërtimi rrugësh e kualifikim sheshesh. Konkretisht kryebashkiaku i Tiranës ka parë të arsyeshme të shpenzojë mbi 82 milionë lekë të reja për ndërtimin e rrugëve tw brendshme në një fshat të panjohur të Tiranës, saktësisht në njoftim thuhet, objekt i kontratës:  “Ndërtimi i rrugëve të brendshme Ibë e Sipërme dhe rikualifikimi i shesheve”.

Ky tender do të jepet për vetëm 6 muaj, por saga e investimeve në sheshe e fasada nga Veliaj nuk mbyllet me rrugën e një fshati ku do të hidhen miliona lekë të taksapaguesve shqiptarë, pasi një tjetër tender është publikuar po sot.

Rehabilitimi i sheshit përpara degës së Thesarit Tiranë, në rrugën “Mustafa Lleshi” është objekti i radhës ku do të hidhen mbi 42 milionë lekë të reja, teksa kohëzgjatja e punimeve për rregullimin e sheshit të Thesarit është parashikuar të zgjasë pesë muaj. Me procedurë të hapur Veliaj do të përzgjedh fituesin e parave të taksapaguesve shqiptar, ku afati i fundit për paraqitjen e ofertës është data 7 dhjetor.

Siç mund të dalloni nga fotoja e Degës së Thesarit Tiranë, në rrugën “Mustafa Lleshi”, oborri në të cilin Veliaj do të investojë as nuk mund të konsiderohet i tillë, pasi hapësira përpara këtij institucioni është thjesht një rrugë e zakonshme e shfrytëzueshme nga qytetarët e Tiranës. Kjo hapësirë siç dallohet qartë është e asfaltuar dhe është bashkim i dy degëzime rrugësh, që nënkupton se ky investim jo vetëm që nuk është domosdoshmëri as për funksionimin e institucionit dhe as për fasadën e tij, por është krejtësisht i panevojshëm, aq më tepër në prag të festave të fundvitit ku ky fond mund të iu shërbente mjaft qytetarëve, të cilët nuk kanë mundësi ekonomike të festojnë.

Këto dy tendera janë dëshmi e abuzimit me fondet publike, referuar objektit që ato mbartin që nuk i përgjigjet shifrave marramendëse që vihen në dispozicion.