Kryebashkiaku i Tiranës, Erion Veliaj sulmoi mediat dhe gazetarët kritikë ndaj tij gjatë fjalës së mbajtur në mbledhjen online të këshillit bashkiak.
“Kur them që duhet të jemi krenarë, jo vetëm për punët, por duhet të jemi krenarë edhe për çfarë kemi arritur, sesi e kemi mbledhur të gjithë llumin bashkë. Është aftësi e jashtëzakonshme ta mbledhësh gjithë llumin bashkë. Mjafton të shikoje dje emisionet e lajmeve dhe ti kupton që një nga meritat tona më të mëdha është se kemi bashkuar kundër nesh të gjithë llumin”, deklaroi Veliaj.
SPAK-un Veliaj e cilësoi si një organizatë të disiplinuar të PS-së, ndërsa prokurorët dhe oficerët e BKH-së i cilësoi “kolegë”.
“Forca jonë politike po bën institucion. Pashë një organizatë të disiplinuar, pashë një organizatë të mençur, pashë staf të Republikës së Shqipërisë që me votën e PS-së dhe me buxhetin e PS-së, ka arritur të ndërtojë një institucion për tu pasur zili. Takon njerëz të përgatitur me pyetjet, që njohin kronologjinë e ngjarjeve, bëjnë pyetje të sakta. Sqarova çfarë gjeta në bashki e Lul Bashës me 37 euro toni, e nuk po e akuzoj atë sepse ishte projekt i IFC-së dhe Bankës Botërore. Unë e shijova vërtetë si një eksperiencë profesionale, mënyrën se si komunikova me kolegët e SPAK, por unë dua të inkurajoj Altin Dumanin, skuadrën e tij, që të ecin vetëm përpara. Ne mund të mërzitemi, kur ka kolegë që të sqarojnë gjëra, por vetëm duke i sqaruar mund të ecim përpara”, tha Veliaj.
Discussion about this post