Veliaj vijon mashtrimet: Në SPAK vajta se kam bërë shumë punë

Disa ditë pas thirrjes në SPAK, Veliaj vijon të këmbëngulë se paraqitja e tij në Prokurorinë e Posaçme u bë me iniciativë të tij.

“E kam kërkuar prej kohësh, e kam thënë publikisht, për një bashkëpunim zyrtar me SPAK-un, për të dhënë çdo dokument, çdo informacion, të një pale që nuk ka asnjë kompleks, që është krenare për Tiranën e pastër dhe që ka shprehur gatishmëri totale për të bashkëpunuar. Kjo është sjellja normale”, tha Veliaj në “Top News” këtë të hënë.

Qëndrim që kryebashkiaku e shfaqi edhe para paraqitjes në SPAK të martën e javës së kaluar, megjithatë që u përgënjeshtrua nga kreu i SPAK Altin Dumani, i cili rrëzoi “paraqitjen vullnetare”. Ky i fundit konfirmoi se Veliaj u thirr nga Prokuroria e Posaçme për të dëshmuar në cilësinë e personit që ka dijeni mbi rrethanat e çështjes së inceneratorit të Tiranës.

Ai justifikoi edhe deklaratën e pazakontë që bëri pas daljes nga SPAK, duke i quajtur prokurorët dhe hetuesit e BKH-së “kolegë”. “Unë ju quaj kolegë edhe juve të medias, pra të gjithë njerëzit që janë angazhuar në një vokacion publik, për të ndihmuar që ky shtet të funksionojë, që administratat të funksionojnë sa më mirë”, tha ai.

Duke theksuar qëndrimin e tij se “sot Tirana është e pastër”, Veliaj u mundua ta pasqyronte aferën e inceneratorit të Tiranës si një rast i rëndomtë dhe jo një aferë shtetërore, siç kanë zbuluar hetimet.

Ai pretendoi se paraqitja në SPAK lidhet thjesht me akuza politike për shkak se sipas tij, “ka bërë shumë punë”.

“Një mënyrë që të mos thirresh në SPAK është të mos bësh asnjë punë. Disa njerëz do paguajnë dhe çmimin që janë në ballë të këtyre punëve dhe do kenë dhe gjithë shigjetat”, tha Veliaj.

Megjithatë, ndryshe mendojnë protestuesit që prej javësh kërkojnë arrestimin dhe dorëheqjen e Veliajt, të cilin e cilësojnë “pronarin faktik të inceneratorit të Tiranës”. Ekzaktësisht me të njëjtat fjalë e përshkroi Veliajn edhe ish-numri dy i qeverisë, Arben Ahmetaj.