Ali Ahmeti nuk pajtohet aspak me vendimin e ndërmarrë nga Zoran Zaev për t’u dorëhequr. Kreu i Bashkimit Demokrat për Integrim ka pohuar se ka pasur një debat me Zaevin ku i ka bërë të ditur qëndrimin e tij.
“Kam pasur një bisedë goxha të tensionuar mbrëmë me Zaevin, që nuk jam pajtuar me lëvizjet e tij që i ka bërë me tërheqjen e tij nga partia dhe nga kreu i qeverisë”, tha Ahmeti.
Ai pohon se i ka bërë të qarta pozicionet e BDI-së, madje duke i përmendur dhe mandatin e fituar 1 vit më parë.
“I kam bërë me dije pozicionet e forta të BDI-së. Këto janë zgjedhje lokale, ne para 1 viti kemi fituar zgjedhjet e përgjithshme dhe ne kemi fituar mandat për të drejtuar politikat e shtetit”, tha kreu i BDI-së.
Partia e Zaev duhet të rishikojë këtë çështje e cila sipas Ahmetit është një veprim i paarsyeshëm e i ngutshëm.
“Kështu që edhe sot kam pasur sërish bisedë me Zaevin me çka i kam thënë se nuk mund të bëjmë kompromise me çështje madhore, që ai të bëjë tërheqje. Të shqyrtohet në partinë e tij ky vendim që për mendimin tim është i paarsyeshëm dhe i ngutshëm”, deklaroi për mediat vendase Ahmeti.
