Në burgun e Salernos është zhvilluar seanca e vleftësimit të ndalimit për Ridha Rahmouni, 26-vjeçarin tunizian të akuzuar për vrasjen e gazetarit sportiv nga Salerno, Luigi “Luca” Esposito.
Gjykata ka vendosur masën e sigurisë “arrest me burg” për Rahmounin, i cili akuzohet se vrau 53-vjeçarin gjatë natës mes 18 dhe 19 korrikut në një zonë bujqësore në Cioffi, në Eboli, dhe më pas i dogji trupin.
Sipas hetuesve, 26-vjeçari ndodhej në mënyrë të parregullt në territorin italian dhe ishte subjekt i një urdhri dëbimi nga vendi.
Pas krimit, ai u lokalizua dhe u arrestua nga karabinierët në një banesë të braktisur në zonë, pas një hetimi intensiv ku u përdorën gjurmët e gishtërinjve, analizat e antenave telefonike dhe prova të tjera të mbledhura nga autoritetet.
Motivi i ngjarjes mbetet ende i rezervuar nga hetuesit, të cilët kanë folur vetëm për “arsye private dhe personale”.
Pas seancës, avokati i Rahmounit, Mauri, deklaroi se në këtë çështje ekzistojnë disa aspekte që kërkojnë hetim të mëtejshëm.
“Ka disa elementë që kanë dalë gjatë marrjes në pyetje pas ndalimit dhe që duhet patjetër të thellohen. Për ngjarje kaq dramatike dhe komplekse është e nevojshme të analizohen disa aspekte të jetës së personave të përfshirë, jo për qëllime thashethemesh, por për të kuptuar më mirë dinamikën e ngjarjes”, tha avokati.
Sipas tij, ekzistojnë edhe elementë teknikë që lidhen me mënyrën e vdekjes së viktimës dhe që mund të ndikojnë në ndryshimin e akuzës aktuale, e cila sipas mbrojtjes është ende “e përkohshme”.
Avokati shtoi se klienti i tij u është përgjigjur pyetjeve të gjyqtarit dhe ka dhënë sqarime të tjera mbi atë që ka ndodhur. Sa i përket mundësisë së përfshirjes së personave të tjerë në ngjarje, mbrojtja nuk dha një përgjigje konkrete.
Nga hetimet e deritanishme dyshohet se takimi mes Luigi Esposit dhe autorit të dyshuar, i cili ka pranuar përgjegjësinë për krimin, ishte i planifikuar dhe viktima nuk e kishte perceptuar si një situatë të rrezikshme, edhe pse vendi ku u takuan ishte i izoluar.
Të dy burrat njiheshin prej rreth një muaji, fakt i konfirmuar edhe nga kontaktet telefonike të regjistruara në ditët para ngjarjes.
Ajo që ka shkaktuar shpërthimin e dhunës nga 26-vjeçari, i njohur edhe me aliasin Amed Jamal, mbetet ende një nga pikat kryesore të hetimit dhe lidhet me motivin që autoritetet po e mbajnë të fshehtë.
Sipas të dhënave të deritanishme, Esposito është dhunuar fizikisht dhe më pas është djegur, ndërsa dyshohet se ka qenë ende gjallë në momentin kur i është vënë flaka trupit.
Discussion about this post