Ashtu sikur është parashikuar në buxhetin e viti 2022, jahtet dhe mjetet lundruese do e blejnë karburantin me 65 lekë akcizë. Por pavarësisht kësaj tarife çmimi për litër karburant do të jetë përsëri më i ulët se karburanti që blejnë qytetarët.
Zëvendësministrja e Financave, Vasilika Vjerro tha sot në komisionin parlamentar të Veprimtarisë Prodhuese se, çmimi total për çdo litër karburant pas kësaj tarife do të arrij në 137-140 lekë. Vjerro tha se, çmimi i karburantit për mjetet lundruese përsëri do jetë më i ulët se ai që paguajnë qytetarët.
“Vendosjen e një takse 65 lekë për litër mbi karburantin që përdoret për furnizimin e mjeteve lundruese, që vijnë në portet tona. Duke i shtuar edhe çmimin aktual të karburantit, pak a shumë këto anije që janë për qëllime turistike do të paguajnë 137-140 lekë litër. Janë rreth 20 mijë tonë që ishte e pataksuar dhe pa të ardhura në buxhet”, tha Vjerro.
Vendimi për të vendosur taksën 65 lekë për litër është përfshirë në ligjin për taksat kombëtare dhe është pjesë e paketës fiskale për vitin 2022. Sigurisht, grupet e interesit që preken nga kjo rritje e kanë kundërshtuar vendimin e qeverisë. Madje edhe ekspertët e ekonomisë e kanë cilësuar si një ndryshim të pa studiuar mirë.
Discussion about this post