Alban Vangjeli, banor i pallatit 976 në lagjen 17 në qytetin e Durrësit, ka kërkuar ndihmën e emisionit “Fiks Fare”, pasi në pallatin ku ai jeton, një pallat i vjetër i ndërtuar vite më parë ndodhet një vendstrehim i cili sot është kthyer në pusetë ujërash të zeza dhe në fole mushkonjash.
Albani thotë se banon në katin e parë të pallatit, dhe hyrja e shtëpisë së tij është ngjitur me dritaren e vendstrehimit dhe sa herë i duhet të futet në shtëpi, duhet të kalojë me maskë. Përveç kësaj ai tregon se sapo hapet dera, mushkonjat futen në shtëpi. Albani thotë se në shtëpi jeton me nënën e moshuar dhe vëllanë e tij me probleme të shëndetit mendor, i cili edhe pse ka shumë vite që nuk del nga shtëpia, mushkonjat e kanë pickuar kudo në trup.
Qytetari tregon se nuk ka gjetur asnjë zgjidhje deri tani, ka vajtur disa herë në UK Durrës, por nuk ka marrë ende përgjigje.
Gazetarët e “Fiks Fare”, bashkë me qytetarin iu drejtuan Ujësjellës Kanalizimeve Durrës, ku inxhinieri Bledar Metalla u shpreh se ndërhyrja në ambientet e brendshme të pallatit, nuk janë në kompetenca të shoqërisë së Ujësjellës Kanalizimeve, edhe pse disa herë i është dhënë ndihmë qytetarit.
Ai thotë se brenda në ambientet e bodrumit nuk është futur ndonjëherë, por që do t’i bashkohet grupit të xhirimit të “Fiks”-it në pallatin ku ndodhet problematika. Pasi Njësia Administrative nr 5 në Bashkinë e Durrësit u njoftua nga gazetarët e “Fiks Fare”, inspektorët e njësisë mbërritën në terren dhe u shprehën se nuk kanë qenë në dijeni më parë për rastin, por tani që u informuan do t’i jepet zgjidhje e menjëhershme situatës. /TCH/
Discussion about this post