Avokati Jordan Daci ka reaguar në lidhje variantin që ka qarkulluar në media rreth projektvendimit të Komisionit të Venecias. Në rrjetin e tij social “Facebook”, ai bën me dije se varianti i cili po qarkullon nëpër media, nuk është origjinali, por sipas tij ka dalë nga qeveria. Daci shton më tej, se ai vetë është një ndër dërguesit e kërkesës në Venecia e si i tillë nuk ka marrë asnjë shkresë apo opinion.
“ Anëtarëve të Komisionit të Venecias dhe as anëtarëve zëvendësues nuk u është shpërndarë asnjë projektvendim dhe këtë e kam të konfirmuar përtej çdo dyshimi “, pohon Daci.
Daci këmbëngul se kjo çështje do kalojë në Gjykatë Kushtetuesee i cili sipas tij është i vetmi organ që ushtron Sovranitetin e Shqipërisë për sa i përket çdo çështje Kushtetuese.
“Asnjë përpjekje e askujt nuk i ligjëron dot zgjedhjet e 30 qershorit 2019. Kjo çështje me Venecian, pa Venecian, me Gjykatën Kushtetuese, pa Gjykatën Kushtetuese, është çështje që brenda pak kohe do marrë përgjigjen e drejtë. Kini durim, Gjykata Kushtetuese do të zgjidhë këtë çështje në favor të interesave të Shqipërisë”, ka përfunduar avokati.
