Nga Enton Abilekaj
Në ditën e vet më të vështirë, Erion Veliaj, tregoi se ka degraduar deri në atë pikë sa të mos ketë më frikë as nga ligji, ka hequr dorë nga çdo vlerë qytetare dhe ka më shumë ngjashmëri me një bandit se me një politikan.
Në ditën kur duhet të tregonte më shumë disponim për instituicionet, me shumë disponim për ligjin, ndërsa shkonte të përballej me përfaqësuesit e ligjit, u bë më i paligjshëm dhe më i paprinciptë.
Vetëm pak minuta përpara mbledhjes së Këshillit Bashkiak të orës 16 30, urdhëroi që mbledhja të zhvillohej online. Këshilltarët e opozitës qe ishin duke hyrë në Bashki, nuk u lejuan nga qindra policët që rrethuan godinën. Nuk u dhanë as mundësinë të hynin online, duke e përjashtuar në mënyrë arbitrare opozitën nga mbledhja. Ky është rast i paprecedentë në 33 vitet e pluralizmit politik, përveçse shkelje e hapur e ligjit.
Nuk i mjaftoi kjo, por duke dalë nga SPAK vendosi të tregonte raportin e tij me median, transparencën dhe të vërtetën. U tha gazetarëve se do të pranonte pyetje pasi të bënte një deklaratë. Pasi lëpiu me komplimente pa kuptim 2 hetuesit që e pyetën dhe gjithë SPAK, vendosi të ikte me vrap, në mbledhjen e Këshillit, qe çuditërisht nuk bëhej dot pa të, megjithëse nuk ka asnjë rol në atë mbledhje që ligjërisht drejtohet nga Kryetarja e Këshillit dhe, kur opozita mungon, nuk ka as nevojë që Kryetari i Bashkisë të jetë prezent për sqarime.
Sepse në fakt nuk dha sqarime, por mori fjalën pa leje, pa procedurë, në kundështim me ligjin, bëri nje monolog fyes, ku mori nëpër gojë gjithë kritikët e tij, shpiku gjëra që nuk ekzistojnë, ngriti akuza personale, sulmoi dhe shfryu urrejtjen ndaj opozitës dhe gazetarëve kritike.
Në më pak se 30 minuta përjashtoi opozitën, përjashtoi dhe median, sulmoi çdo mendim ndryshe. Në më pak se 30 minuta bëri atë që Komunizmit nuk i mjaftuan 45 vjet dhe shefi i tij nuk e ka menduar ta bëjë në mënyrë kaq absolute dhe asgjësuese. Ndërkohë, ata që e thirrën dhe e pyetën, i quante kolegë, me një lëpirje ekzemplare që edhe Edi Rama do të bëhej xheloz. I rrezikshëm kur ka pushtet dhe rrënqethes në lëpirje kur ka interes, Erion Veliaj tregoi vetë pse nuk ka asnjë lidhje me një detyrë publike.
/Dosja.al/
Discussion about this post