Piloti holandez, Max Verstappen, që përfaqëson Red Bullin, fitoi sot garën e Çmimit të Madh të Austrisë në Formula 1, suksesi i pestë radhazi, si dhe i shtati sezonal, në një botëror që po e dominon më shifra të frikshme.
Kampioni i botës në fuqi e dominoi garën e zhvilluar në pistën e Seltweg, duke e lëshuar kreun vetëm për 10 xhiro, të cilin e rifitoi shumë kollaj.
Në vendin e dytë u klasifikua piloti nga Monako, Charles Leclerc me Ferrari, që bëri një garë të mirë, ashtu sikurse u paraqit makina italiane në tërësi në këtë fundjavë.
Në vendin e tretë u rendit meksikani Sergio Perez me makinën tjetër Red Bull, pozicion që e fitoi pas parakalimit të vështirë ndaj spanjollit Carlos Sainz (Ferrari) disa xhiro nga fundi.
Makina virtuale e sigurisë në pjesën e parë të garës e bëri disi më interesante betejën për zonën e pikëve, pasi pilotët hynë në bokse për të ndërruar gomat e modifikuar strategjitë.
Ndërkohë që sot ndikuan edhe penalitetet që komisarët e garës dhanë për pilotët për tejklalimin e limiteve të pistës (mes tyre edhe Sainz e Hamilton). Kjo solli mjaft parakalime në pistë.
Gjithsesi, Verstappen bëri një garë me vete, duke e dominuar botërorin e Formula 1, i pa shqetësuar nga rivalët.
Ai bëri një ndalesë më shumë se rivalët për të marrë edhe pikën shtesë të xhiros së shpejtë dhe sërish nuk u arrit nga rivalët.
Në zonën e pikëve u renditën Norris, Alonso, Hamilton, Russell, Gasly e Stroll.
Discussion about this post