Presidenti Ilir Meta ka reaguar për ngjarjen e rëndë në Komisariatin e Kavajës ku i burgosuri Ilvi Meta dyshohet se u vetëvra në qeli. Meta e ka konsideruar ngjarjen si tragjedi, ndërsa shton se është i papranueshëm faktin që një qytetar humb jetën brenda institucioneve shtetërore
Presidenti bën thirrje për zbardhjen sa më parë të ngjarjes së rëndë për të vënë para drejtësisë përgjegjësit për tragjedinë.
“Duke i shprehur ngushëllimet më të sinqerta familjes së të ndjerit Ilvi Meta, e konsideroj tepër të rëndë dhe të papranueshëm faktin që një qytetar humb jetën brenda institucioneve shtetërore, sikundër është Komisariati i Policisë së Kavajës. Humbja e një jete në një moshë fare të re brenda Komisiariatit të Policisë përbën jo vetëm një tragjedi familjare, por trondit thellësisht besimin e qytetarëve tek organet ligjzbatuese. Bëj thirrje për zbardhjen sa më parë të rrethanave të vdekjes tragjike të të riut Ilvi Meta dhe vendosjen përpara drejtësisë të përgjegjësve për këtë tragjedi të pajustifikueshme”, shkruan Meta.
I riu u arrestua ditën e djeshme pasi akuzohej se kishte kryer vjedhje në një banesë, dhe vetëm pak më vonë erdhi njoftimi i vetëvrasjes, ndonëse familjarët kanë hedhur akuza të forta në drejtim të policisë duke e konsideruar si vrasje.
Discussion about this post