Veto e Bullgarisë për MRV/ Xhixho: Lajm i keq për ne, raporti DASH tregon gjendjen tonë

Deputetja e Lëvizjes Socialiste për Integrim, Erisa Xhixho, ka folur sot gjatë një interviste televizive në lidhje me procesin e integrimit. Ajo theksoi se mos heqja e vetos nga Bullgari ndaj Maqedonisë së Veriut është një lajm i keq edhe për Shqipërinë. Gjithsesi, sipas saj rrugën tonë në BE e pengojnë edhe 15 kushte e shumëpërfolura që nuk plotësohen, ndërsa shtoi se Shqipëria ka shumë për të bërë në rrugën europiane.

“Së pari mendoj që procesi i integrimit sa vjen dhe është zgjatur për shkak të shumë kushteve që u vendosën, 15 kushtet e famshme. Mendoj që çdo vonesë e këtij procesi është jo në të mirë të vendit dhe lidhja e Shqipërisë me Maqedoninë e Veriut, kjo veto për të ecur në hapjen e negociatave nuk është një lajm i mirë.

Shqipëria ka ende shumë punë për të bërë në rrugën europiane. Edhe kushtet që u shtuan, në 2016 kemi pasur 5 e shkuan 15, padyshim që ky proces tek i cili është më mirë të hapen dje se sa nesër negociatat. Mendoj që raporterja për PE ka dhënë një deklaratë të fortë për Ballkanin e Hapur.

Penalizimin që ka ardhur për Shqipërinë do të duhet të shihet dhe të analizohet, por edhe Shqipëria ka penalizuar edhe para disa vitesh Maqedoninë. Mendoj që sot, sidomos në momentin që jemi, me ndikim rus në Ballkan, mospasja e sanksioneve të Serbisë ndaj Rusisë, avancimi i procesit të integrimit për vendet e Ballkanit është jetik, për kombin shqiptar”,  u shpreh ajo.

Ndër të tjera Xhixho shtoi se raportet për Shqipërinë, e kryesisht ai i DASH, tregojnë gjendjen se ku ndodhet vendi ynë, duke u ndalur te korrupsioni “Mendoj që raportet e tjera, ai i Dash që nënvizon të gjithë situatën në Shqipëri, është një reflektim se ku ndodhet sot Shqipëria, korrupsioni, pandëshkueshmëria, përdorimi i të dhënave personale, që u përdorën nga partia në pushtet në zgjedhjet e 25 prillit. Të mos flasim për sistemin e drejtësisë, jo funksional”, tha ajo. Ndërsa u shpreh më tutje se Ballkani i Hapur është iniciative që nuk ka transparencë, pasi nuk dihet çfarë përfitimesh i vinë Shqipërisë nga kjo nismë.