Pas konferencës së sotme të kreut të Partisë Demokratike, Lulzim Basha, ku foli ndër të tjera edhe për vettingun në politikë nëpërmjet SPAK, ish-kryeministri, Sali Berisha, ka rikonfirmuar në faqen e tij në FB qëndrimin e prerë për këtë çështje.
Sipas Berishës vettingu i politikanëve është jetik, ndërsa vettingu nga SPAK-u i partisë është policesk, pengmarrje e deputetëve nga kryeministri.
“Vettingu i deputetëve është jetik! Vettingu nga SPAK-u i partisë është policesk, pengmarrje e deputetëve nga Kreu i Meduzës!” – shkruan Berisha duke e shoqëruar këtë deklaratë edhe me videon e deklaratës së tij gjatë takimeve me rastin e “Foltores”.
Kujtojmë se vettingu i politikanëve është një nga iniciativat e Partisë Demokratike. Ditën e sotme kreu i PD në një konferencë me gazetarët, sqaroi dhe një herë se vettingu i politikanëve do të stimulojë SPAK-un që të hetojë politikanët e korruptuar.
