Lideri i opozitës, Lulzim Basha e ka nisur të martën me një mesazh për Vettingun në politikë. Kryedemokrati ka shpërndarë në Twitter një raport të “Transparency International” lidhur me një shqyrtim të rasteve të korrupsionit të nivelit të lartë dhe ligjeve të bëra me porosi nga viti 2008 deri në 2020.
Për Bashën, shteti është i kapur nga korrupsioni, dhe nuk i shërben aspak qytetarëve e se buxheti i tij është në funksion të PPP-ve klienteliste dhe jo të familjeve.
“Një shtet i kapur nga korrupsioni nuk i shërben qytetarëve, por një pakice që gjallon në kurriz të shumicës dërrmuese të shqiptarëve, ndaj edhe buxheti është në funksion të PPP-ve klienteliste, jo të familjeve dhe sipërmarrjeve të ndershme. Kjo krizë korrupsioni po varfëron qytetarët, po largon të rinjtë e të rejat dhe po asfikson ekonominë. Zgjidhja është pastrimi i politikës nga të korruptuarit dhe politikanët e lidhur me krimin. Zgjidhja është vettingu në politikë!”, shkruan Basha.
PD propozon një Vetting të njëjtë si ai i Reformës në Drejtësi, ku këtë herë subjekte nuk do të jenë gjyqtarët dhe prokurorët, por politikanët. Vettingu në Drejtësisë ka tri shtylla; kontrolli i pasurisë; integriteti i gjyqtarit, prokurorit, apo punonjësit të drejtësisë, pra nuk duhet të kenë lidhje të dyshimta me krimin, dhe në fund profesionalizmi.
Discussion about this post