Deputetja e PD, Ina Zhupa, ka deklaruar se grupi parlamentar ka vendosur të çojë deri në fund kërkesën për vettingun ndaj politikanëve. Sipas saj është zgjidhja më e mirë që ai politikan, i cili nuk justifikion dot pasurinë apo ka lidhje me krimin t’i hiqet mandati.
” Në lidhje me vettingun politik ne kemi marrë edhe mendimin e Komisionit të Venecias. Pra, i është kërkuar mendim Komisionit të Venecias nga kuvendi dhe ka ardhur i gjithë relacioni. Vettingun e politikanëve ne e kemi paraqitur edhe në vitin 2018 por u rrëzua nga maxhoranca sepse ata kanë frikë sepse janë të lidhur me krimin sepse ata kanë paratë në offshore.
Me e rëndësishme në paketë është lidhje me krimin e organizuar, pastrimi i parave të pista, futja e mekanizmit anti-mafia për të parë nga vjen burimi i parave. Të gjitha këto çojnë në moslejimi për të marr mandat apo në djegien e mandatit që ti mund të kesh në krye të institucioneve apo në parlament”, tha ajo.
Kjo deklaratë erdhi pas mbledhjes së grupit të Partisë Demokratike, ku Lulzim Basha deklaroi se brenda javës do të çojnë në Kuvend propozimin për vettingun e politikanëve, njëjtë siç po bëhet edhe me vettingun e gjyqtarëve dhe prokurorëve.
