Ashensorët në Shqipëri nuk kontrollohen dhe përgjegjësinë kryesore për këtë e mban Inspektorati Shtetëror i Mbikëqyrjes së Tregut. Kjo sepse, është ky institucion ai që duhet t’i kërkojë administratorit të pallatit dhe personit përgjegjës për ashensorin kontratën CE, të regjistrimit.
Pas tërmetit të 26 nëntorit, qeveria nxori një vendim i cili kërkon që çdo ashensor duhet të regjistrohet dhe ISHMT duhet të bëjë ekzaminimin e duhur për të verifikuar nëse përgjegjësit kanë zbatuar ligjin. “Në mbështetje të nenit 100 të Kushtetutës, Këshilli i Ministrave VENDOSI: 1. Miratimin e rregullit teknik “Për sigurinë.
Inspektorati Shtetëror i Mbikëqyrjes së Tregut (ISHMT)” është struktura përgjegjëse e mbikëqyrjes së tregut nën ministrinë përgjegjëse për tregtinë”, thuhet në vendim.
Vendimi u publikua në 2 dhjetor të 2019 dhe kërkon që ekzaminimi i plotë i ashensorëve ekzistues, të vendosur në shërbim deri më 31 dhjetor 2019, të kryhet jo më vonë se data 31 dhjetor 2020.
Por faktet e deri tanishme dhe më konkretisht ngjarja e rëndë që ndodhi në Astir ditën e djeshme tregon që ky vendim nuk është respektuar, por as ISHMT nuk ka kryer kontrollet që ka për detyrë. Konkretisht vendimi i ri i ngarkon si detyrë ISHMT që të lëshojë certifikatë vetëm nëse janë kryer kontrollet e duhura dhe të evidentojë ato raste kur ashensorët nuk janë të certifikuar. “Inspektorati Shtetëror i Mbikëqyrjes së Tregut (ISHMT) lëshon certifikatën e regjistrimit mbas përfundimit me sukses të procedurës së regjistrimit. 4.5 Certifikata e regjistrimit duhet të ketë numrin unik të regjistrimit të përcaktuar nga Inspektorati Shtetëror i Mbikëqyrjes së Tregut (ISHMT)”, thuhet në vendim.
Banorët në Astir treguan se ashensori kishte dy vjet që shfaqte probleme dhe punonjësit përgjegjës shmangnin kontrollet. Pra, kjo tregon se ashensorët në vend nuk kontrollohen dhe as nuk janë marrë masa nga qeveria, kur tashmë bëhet një vit që vendimit i ka kaluar afati.
