Një kërkesë e vëzhguesit Theo Jacobs të Operacionit Ndërkombëtar të Monitorimit për hetimin e një gjetjeje në çështjen e vetingut të gjyqtarit të Tiranës, Ervin Pollozhani solli shtyrjen e seancës në Kolegjin e Posaçëm të Apelimit të martën më 11 nëntor, ku palët ishin ftuar për të paraqitur konkluzionet përfundimtare.
Që në fillim të seancës, Jacobs bëri me dije se kishte depozituar një gjetje dhe një opinion për trupin gjykues të Kolegjit, përmes së cilave u kërkonte hetimin e mëtejshëm të transaksioneve që kanë të bëjnë me blerjen e një apartamenti nga Pollozhani dhe bashkëshortja e tij, ku atyre u është kthyer një pjesë e vlerës së paguar.
Jacbos kërkon që të pyetet si dëshmitar administratori i shoqërisë që ka shitur apartamentin si dhe të merren prej kësaj shoqërie aktet që kanë të bëjnë me rikthimin e vlerës 4.4 milionë lekë subjektit dhe bashkëshortes së tij. Po ashtu, kërkon që në funksion të gjykimit të çështjes të merren dhe akte që kanë të bëjnë me kontratat për apartamentet e tjerë, si dhe të verifikohet për çështje penale apo civile të blerësve të banesës apo të familjarëve të tyre në gjykatat ku ka ushtruar funksionin para kryerjes së këtij transaksioni.
Kryesuesja e trupit gjykues, Ina Rama u kërkoi palëve që të paraqesin qëndrim lidhur me këtë kërkim të vëzhguesit të Operacionit Ndërkombëtar të Monitorimit, ONM-së. Prokurori Klodian Braho, i cili përfaqëson drejtuesin e SPAK, Altin Dumani në çështjen e vetingut të gjyqtarit Pollozhani, kërkoi afat kohor për t’u njohur me aktin e parqitur nga Jacobs.
Ndërkohë, përfaqësuesja ligjore e gjyqtarit Pollozhani, avokatja Romina Zano pyeti nëse gjetja kishte te bënte me ndonjë fakt të ri të pahetuar më parë gjatë hetimit administrativ në KPK. Ajo vërejti se ONM jep qëndrim të unifikuar institucional dhe se nuk mund të jetë opinion i një vëzhguesi veçmas.
Vëzhguesi ndërkombëtar, Theo Jacobs deklaroi se të dhënat janë në dosjen e hetimit administrativ dhe se opinioni është bazuar në faktet që janë aty. Sipas tij, të blesh lirë dhe të shitësh shtrenjtë bie erë.
Jacobs shtoi se kërkimet e tij për hetim e verifikim të mëtejshëm kanë si qëllim që të qartësojnë situatën, ose “aroma” të largohet, ose të gjendet “trupi i vdekur”.
Sipas Zanos, është Komisioneri Publik që e vendos në lëvizje KPA-në brenda 15 ditëve nga njoftimi i vendimit të arsyetuar. Po ashtu, solli në vëmendje se ONM bënë rekomandim pranë institucionit të Komisionerëve Publikë, që e vë në lëvizje këtë të fundit për të ushtruar ankim.
Avokatja Zano tha ndër të tjera se, çfarë u paraqit ka pamjen e një opinioni subjektiv, ku u përmendën fjalë si, “nuhas” apo “trup i vdekur”, që duken si qasje personale të vëzhguesit ndërkombëtar.
Ajo shpjegoi se ONM ka monitoruar procesin dhe vëzhguesi ndërkombëtar i mëparshëm i ka njohur të gjitha provat, si dhe e ka pyetur subjektin për rrethanat që trajtohen në gjetjet dhe opinonin e Jacobs.
Po ashtu, theksoi se gjetja po paraqitet në fazën kur çështja është në fazën e konkluzioneve përfundimtare.
Zano pyeti se çfarë donte të tregonte paraqitja e kësaj gjetjeje, nëse hetimi administrativ i mëparshëm nuk ishte i plotë, apo po vendosej në dyshim integriteti profesional i vëzhguesit ndërkombëtar të mëparshëm, Steven Kessler?
Kryesuesja Ina Rama solli në vëmendje se të gjitha qëndrimet mund të paraqiten nga palët pasi të njihen me aktin e dorëzuar nga Jacobs.
Në përgjigje të qëndrimeve të Zanos, vëzhguesi Theo Jacobs, pyeti nëse kishte ndonjë përcaktim ligjor ku parashikohej afat që ndalonte paraqitjen e gjetjeve. “Më jepni përcaktimin ligjor që ndalon të paraqes gjetje”, u shpreh ai dhe shtoi se gjendej në sallë në cilësinë e vëzhguesit të ONM-së dhe se bazuar në këtë cilësi, i kishte kërkuar trupit gjykues që të merrte vendim për kërkimin e tij për thirrjen si dëshmitar të ndërtuesit që ka shitur apartamentin dhe të kryheshin verifikimet e tjetra lidhur me këto transkasione dhe personat e përfshirë.
“Po kërkoj që trupi gjykues ta marrë vendimin bazuar në gjithë provat”, deklaroi Jacobs.
Pasi u tërhoq, trupi gjykues i Kolegjit vendosi të shtyjë seancën për më datë 14 nëntor, ora 10:00, për t’u dhënë kohë palëve në proces për të mbajtur një qëndrim,
Gjatë seancës parardhëse më 28 tetor, vëzhguesi ndërkombëtar Theo Jacobs, i drejtoi disa pyetje subjektit lidhur me transaksionet e kryera për blerjen dhe shitjen e një apartamenti në Tiranë. Jacobs solli në vëmendje se, pas kthimit të një vlerë nga ana e shoqërisë ndërtuese, prindërit e bashkëshortes që kishin kontribuar, nuk kishin marrë ndonjë pjesë. Po ashtu, sipas vëzhguesit, çmimi i blerjes sipas kontratës së vitit 2012, mbetet me një diferencë të konsiderueshme prej 4.4 milionë lekësh, me atë të shitjes në 2014-ën.
Jacobs u shpreh se ky transaksion nuk përputhej me logjikën ekonomike, ndërkohë që vlera monetare e përfituar nga shitja ishte depozituar në llogarinë e gjyqtarit Pollozhani. Duke i cilësuar transaksionet se një “abrakada financiare”, Jacobs u shpreh se vetëm në Shqipëri kishte parë gjëra të tilla.
Për kthimin e shumës nga shoqëria ndërtuese, Pollozhani shpjegoi gjatë seancës parardhëse se kishte të bënte me sipërfaqen me të vogël të apartamentit të mëparshëm të dorëzuar në vitin 2012. Subjekti ka deklaruar gjatë gjithë kohës se nuk ka pasur kontribut në blerjen e kësaj pasurie, por sipas tij ishte blerë nga bashkëshortja dhe prindërit e saj para martese.
Pollozhani shpjegoi se vjehrri e vjehrra nuk morën pjesë, pasi kontirbuesja më e madhe për pagesën e çmimit të apartamentit të mëparshëm kishte qenë bashkëshortja, me rreth 90% të vlerës. Lidhur me çmimin e shitjes më të lartë, subjekti parashtroi se apartamenti ishte dhënë me gjithë orenditë që kanë kosto plus, si dhe evoluimin e çmimit të tregut./ BIRN
Discussion about this post