Pamjet që shihni në video i përkasin Delvinës mbrëmjen e kësaj të marte, ku ngjan me një situatë apokaliptike nga zjarri që i është afruar spitalit të qytetit.
Burime bëjnë me dije se për të shmangur tragjedinë, është urdhëruar largimi i bombolave të oksigjenit nga spital, që të mos shkaktojnë shpërthime.
Nga pamjet shihet se flakët kanë rrethuar të gjitha lagjet e qytetit, teksa njerëzit e tmerruar vrapojnë dhe bërtasin.
Zjarri po shtrihet deri në lagjen ‘Llakë’ të qytetit, teksa aktualisht po punojnë 4 zjarrfikëse të Delvinës për shuarjen e flakëve, por duket e pamundur.
Kërkohet ndërhyrje nga ajri për të shmangur një katastrofë me pasoja të paimagjinueshme, pasi zjarri po u afrohet edhe puseve të naftës.
Banorët dëshmojnë se situata është apokaliptike.
“Po digjen shtëpi, ka panik dhe njerëzit po dalin me mbathje rrugëve, situatë apokaliptike. U dogj gjithçka për 20 minuta. Nuk e di për njerëzit, por nesër mund të shihen dëmet, se drita s’ka dhe shikon vetëm zjarre. Nuk merr dot frymë, të mbyt tymi, na kanë bërë thirrje për t’u larguar. NUk kam parrë situatë të tillë asnjëherë, edhe të huajt janë tmerruar. Iku mbaroi gjithçka, po digjen të gjitha, nuk vihet nën kontroll fare, po zbret poshtë dhe po bëhet shkrumb çdo gjë. Era e shkaktoi të gjithë situatën se është e fuqishme. I kemi larguar familjet, por vetë jemi këtu”, dëshmon një prej tyre.
Një tjetër banor u shpreh i shqetësuar:
“Na dridhet trupi nga frika, gjendja është jashtëzakonisht keq, s’mund ta imagjinoni. Kërkojmë ndihmë, çfarë do bëjmë me 2 zjarrfikëse në këtë katastrofë. Po digjet Xhermallaha dhe Vllahati! Jemi larguar nga banesat, nuk e dimë çfarë bëhet më”.
gijotina.com/
Discussion about this post