Video tregon momenti kur 24-vjeçari Eduart Buçeza plagoset në këmbë me armë zjarri nga djali i xhaxhait të tij, Iliri, tashmë i shpallur në kërkim nga Policia e Durrësit.
Në pamjet e një kamere sigurie të publikuara nga “TV Klan“, shihet 24-vjeçari qëllohet nga i afërmi tij vetëm pak sekonda pasi parkon makinën në oborrin e banesës në fshatin Shënavlash.
Ngjarja është regjistruar rreth orës 20:38 të mbrëmjes së të martës, me Ilir Buçezës që mbërrin në vendngjarje me makinë fill pas djalit të xhaxhait.
Me pistoletë në duar ai afrohet tek makina e të afërmit të tij, thërret Eduart Buçezën dhe më pas e qëllon dy herë me pistoletë në këmbë.
Pasi e ka lënë të plagosur Ilir Buçeza, 33 vjeç, largohet qetësisht me makinën e tij që e kishte parkuar në pjesën e jashtme të oborrit të kushëririt.
Ky fundit shkoi vetë në Spitalin e Durrësit për ndihmë mjekësore, teksa përpara oficerëve të policisë refuzoi të japë detaje lidhur me shkaqet dhe vendin ku ishte plagosur.
Pavarësisht kësaj, policia dhe prokuroria Durrësit zbardhi itinerarin e lëvizjes së 24-vjeçarit, si dhe zbuloi se mes tij dhe djalit të xhaxhit, Ilir Buçeza ka patur një konflikt çasti për motive të dobëta, arsye kjo që shtyu atë në plagosje.
Discussion about this post