Policia e Tiranës ka vendosur një shpërblim prej 5 mijë euro për kapjen e personit që grabiti pikën e këmbimit valuator në zonën e Astir në Tiranë.
Dyshimet e para janë se grabitësi ka mundur të marrë një shumë nga 30 në 40 mijë euro, ndërsa është larguar më pas me biçikletë. Grabitësi dyshohet se ka qenë i armatosur, ndërsa mbante në fytyrë një maskë kirurgjikale, syze dhe kapele.
“Në funksion të hetimeve për zbardhjen e ngjarjes së ndodhur mëngjesin e sotëm, ku një shtetas është futur në një pikë për transferta parash dhe këmbimi valutor në Unazë të Re, dhe nën kërcënimin e një arme zjarri ka marrë një shumë parash dhe është larguar me biçikletë, me qëllim identifikimin dhe kapjen e autorit të dyshuar, Drejtoria Vendore e Policisë Tiranë vë në dispozicion pamjet filmike të ngjarjes.
DVP Tiranë fton qytetarët që të japin informacion për autorin e kësaj ngjarjeje dhe vendos shpërblim 5000 euro, për çdo informacion të vlefshëm që do të çojë në kapjen e autorit.
Drejtoria Vendore e Policisë Tiranë vendos në dispozicion të qytetarëve, numrin e telefonit 0694110415, duke garantuar anonimatin e plotë të çdo telefonuesi”, njoftoi policia.
Discussion about this post