(VIDEO) Kishin përshtatur banesën për tharje të kanabisit, sekuestrohen 200 kg drogë në Lezhë

200 kilogramë lëndë narkotike të llojit kanabis janë sekuestruar  nga efektivët e policisë në Lezhë e Mirditë.

Sekuestrimi i lëndës narkotike u zhvillua në kuadër të operacioneve policore të koduara “Procesi”dhe “Furia” për goditjen e veprimtarisë kriminale të kultivimit dhe prodhimit të kanabisit në Lezhë dhe në Mirditë.

Uniformat blu bëjnë me dije se në saj të operacioneve anti-drogë ranë në pranga pesë persona.

Në kuadër të operacionit “Procesi” në fshatin Shtuf Mirditë  u arrestuan shtetasit: Pjetër Çurgu, Artur Moli,  Preng Moli dhe Mark Moli. Mësohet se personat në fjalë kishin përshtatur ambient për tharje dhe përpunim të kanabisit në fshatin Shtuf, Mirditë.

Në fshatin Shtuf, njësia administrative Kaçinarë, Mirditë, gjatë kontrollit në një banesë të pabanuar u gjetën qindra bimë në proces tharje me peshë totale 108 kilogramë kanabis, njofton policia.

Ndërkohë në kuadër të operacionit “Furia” në fshatin Gjonbardhaj, Kashnjet, gjatë kontrollit të ushtruar në një stallë bagëtish, janë gjetur dhe sekuestruar rreth 92 kilogramë lëndë e dyshuar narkotike kanabis sativa.

Në vijim të veprimeve u bë arrestimi në flagrancë i shtetasit Gj. M. 46 vjeç, banues në Shkodër.

Në bashkëpunim me Prokurorinë vijon puna për identifikimin dhe kapjen e personave të tjerë të përfshirë në këto dy raste të veprimtraisë kriminale të kultivimit dhe prodhimit të kanabisit Materialet procedurale iu referuan Prokurorisë, për veprime të mëtejshme.

gijotina.com/