Në Podgoricë janë zhvilluar protesta të cilat janë tensionuar dhe më pas është përdorur dhuna. Ljubomir Filipovic, aktivisti dhe publicist nga Mali i Zi ka publikuar pamje nga protestat e dhunshme që po zhvillohen sot në Podgoricë. Në një postim në Tëitter, ai shkruan se përgjegjëse për këto pamje e dhunime është Qeveria e Malit të Zi dhe Kisha Serbe.
“Skena të tmerrshme nga Mali i Zi. Qeveria bëri gjithçka që kjo të ndodhte. Kisha serbe edhe më shumë. Patriarku Porfirius u takua me qeverinë Maybachs,”- shkruan aktivisti krah pamjeve.
Sot në Podgoricë qytetarët kanë dalë në protestë, ndërkohë që në manastirin e Cetinjes po bëheshin përgatitje për inagurimin e Kreut të Ri të Kishës Serbe, pas vdekjes së parardhësit të tij nga Covid-19. Kundërshtarët e kishës serbe kanë kërkuar që përurimi të mbahej diku tjetër, por Kisha ka refuzuar. Protestuesit janë përplasur me policinë.
Konflikti nisi më herët për shkak të një neni në ligjin e ri për lirinë e fesë, që miratoi në fund të dhjetorit parlamenti malazez. Sipas tij objekte dhe troje, të cilat aktualisht i përkasin Kishës Ortodokse Serbe (SPC) në Malin e Zi i kalojnë shtetit, në rast se kisha nuk vërteton dot se ajo i ka këto prona nën pronësinë e saj edhe para vitit 1918. Sipas interpretimit të qeverisë në Podgoricë në fund të Luftës së Parë Botërore Mali i Zi u pushtua me dhunë në kuadër të Mbretërisë së Jugosllavisë nga ushtria serbe. Këtë qëndrim e ndajnë edhe shumë politikanë opozitarë malazezë. Sipas këtij qëndrimi, Kisha Autoqefale Ortodokse e Malit të Zi, (MPC) iu nënshtrua patriarkut të kishës serbe, SPC, që e ka selinë në Beograd. Rrjedhoja: kështu kanë kaluar pa të drejtë prona kishtare tek patriarkati serb.
