Ka nisur me tensione seanca e sotme në parlament, e para për vitin 2024. Gazment Bardhi, kreu i grupit Parlamentar i PD-së, i ka kërkuar Lindita Nikollës të nxjerrë efektivët e Gardës së Republikës nga salla.
Deputetët demokratë kanë përdorur bilbilat, ndërsa Nikolla ka vijuar seancën, teksa ligjvënësit demokratë kanë qëndruar pranë foltores në këmbë.
“Nxirr gardën jashtë, jemi vend anëtar i NATO-s, respektoni rregulloren, nxirrni gardën jashtë”, ishte kërkesa e Bardhit, drejtuar Nikollës.
I vetmi moment kur salla u kthye në normalitet ishte kur u vendos himni kombëtar, ndërsa më pas janë rikthyer tensionet. Në lozhat e Kuvendit ndodhen së paku dy ambasadorë, ai i Britanisë së Madhe dhe i Gjermanisë, por edhe Presidenti Bajram Begaj.
“Nuk mund të provokoni opozitën, nxirrni Gardën jashtë”, ishte kërkesa e vazhdueshme e Bardhit, drejtuar Nikollës.
“Uluni në vend, ja kush jeni ju, uluni. Ju tërheq vëmendjen, ju paralajmëroj për herë tfundit, zini vendet tuaja”, ishte përgjigjia e Lindita Nikollës, por pa pranuar që të “çlirojë” sallën e Parlamentit nga forcat e shtuara të Gardës së Republikës.
Discussion about this post