Situata e zjarrit në Vlorë paraqitet e rënduar. E favorizuar edhe nga era, shpejtësia me të cilën po përhapen flakët është e frikshme, ndërsa zjarri ka bllokuar rrugën e vjetër nacionale Vlorë-Fier. Si pasojë e daljes së flakëve shumë pranë rrugës, qarkullimi i mjeteve është ndaluar në zonë, për të mos rrezikuar jetën.
Deri më tani raportohet se nëse flakët favorizohen ende nga era do të rrezikojnë edhe banesat në fshatin Bestrovë, që ndodhen më pak se 2 kilometra larg vatrës së zjarrit. Afërsi që ka ngjallur panik tek banorët e zonës, të cilët gjithashtu u janë bashkuar zjarrfikësve për ndihmë. Por rreziku nuk nis dhe përfundon me zjarrin.
