Policia e Tiranës ka arrestuar 3 persona dhe ka shpallur në kërkim 3 të tjerë si pjesë e një grupi grabitësish që vidhnin kasaforta në biznese të ndryshme në zonën a autostradës Tiranë-Durrës, por jo vetëm.
Mësohet se, në pranga ka rënë Ilir (Mikel) Boja, 47 vjeç, i dënuar më parë për veprën penale “Armëmbajtja pa leje”; Elton Tafa (Beu), 39 vjeç, i dënuar më parë për veprën penale “Vjedhja” dhe Egzon Mhilli (Murati), 27 vjeç.
Këta 3 persona janë arrestuar në kushtet e flagrancës gjatë kohës që ishin duke kryer një vjedhje në një subjekt tregtar në autostradë.
Në kërkim u shpallën K. A. (M)., 32 vjeç, i dënuar më parë për veprën penale “Vjedhja”; A. K., 29 vjeç dhe F. D. (P.) 25 vjeç. Nga tërësia e veprimeve hetimore ka rezultuar se këta persona janë autorë të shtatë rasteve të vjedhjeve dhe tentativa vjedhjesh të kasafortave në biznese të ndryshme.
Ndërkohë, nga hetimet e kryera, rezulton se K. A. (M)., në bashkëpunim me persona të tjerë të paidentifikuar, në një banesë në zonën e Gjirit të Lalëzit, dyshohet se ka vjedhur një sasi parash.
Në cilësinë e provës materiale janë sekuestruar një armë zjarri pistoletë me fishekë luftarakë, mjete të ndryshme që dyshohet se përdoreshin për kryerjen e vjedhjeve, 1 automjet dhe 8 aparate celularë.
Discussion about this post