Qeveria e Kosovës ka nisur të hënën aplikimin e masës së reciprocitetit për targat e automjeteve nga Serbia. Mirëpo, qytetarët serbë kanë bllokuar rrugët në afërsi të pikave kufitare në Bërnjak dhe Jarinjë, në shenjë pakënaqësie.
Mediat kosovare shkruajnë se protestuesit serbë kanë shtuar numrin e mjeteve të rënda në rrugë për të bllokuar kalimin e automjeteve.
Gjatë ditës së djeshme xhandarmëria serbe në afërsi të Jarinjës, është vendosur në disa pika të larta duke vrojtuar Njësitë Speciale të Kosovës.
Vendosja e reciprocitetit të targave ka ngjallur shumë pakënaqësi në Beograd ku presidenti Alexandër Vucic ka bërë thirrje për heqjen e reciprocitetit. Ai ka bërë të qartë kushtin për t’u ulur në tryezë, teksa thotë se vetëm nëse Kosova do të kthehet në atë që ishte para 20 shtatorit, atëherë Serbia do të ulet të dialogojë.
Nga ana tjetër, kryeministri kosovar Albin Kurti ka thënë se nuk e kupton inatin e Vucic, pasi ai ishte në dijeni se marrëveshja do skadonte më datë 15 shtator. Ndër të tjera, Kurti i bën thirrje serbëve që të mos i bllokojnë rrugët, teksa ka shtuar se vendimi për reciprocitet i targave është i drejtë.
Edhe ndërkombëtarët nuk kanë ndenjur në heshtje, pasi përfaqësues të BE kanë bërë thirrje të vazhdueshme për uljen e tensioneve mes dy vendeve.
Ditën e hënë, qeveria e Kosovës njoftoi se të gjitha automjetet që mbajnë targa të Serbisë dhe hyjnë në Kosovë, duhet të pajisen me targa të përkohshme, që sipas këtij vendimi mund të bëhet në të gjitha pikat kufitare të Kosovës.
Targat duhet të vendosen në vende të dukshme dhe për vendosjen e tyre do të ketë një pagesë prej 5 eurosh, ndërsa shkruhet gjithashtu se vlefshmëria e targave zgjat 60 ditë.
