Presidentja e Kosovës, Vjosa Osmani, ka përforcuar opinionin e saj mbi marrëdhëniet me Serbinë duke u shprehur se kjo e fundit dëshiron që Ballkani Perëndimor të mos ketë stabilitet, pasi sipas saj shtetet që nuk janë anëtare të BE-së shihen si vende të përkohshme nga Serbia.
“Serbia i sheh vendet që nuk janë në BE si vende të përkohshme, diçka që mund t’i shkatërrojë. Kjo nënkupton se do të ketë më shumë tentime për destabilizim”, ka thënë Osmani në një panel të organizuar nga Shkolla për Studime të Avancuara Ndërkombëtare në Universitetin Johns Hopkins, në Uashington.
Të qenurit ende në tavolinë negociuese, për presidentet Osmani është arsye që Serbia të kërkojë nga vendet larg Ballkanit që të mos e njohin Kosovën si shtet të pavarur.Sipas Osmanit, Serbia është duke abuzuar me dialogun me Kosovën, të ndërmjetësuar nga Bashkimi Evropian.
“Abuzojnë me faktin se ne jemi në tavolinë negociuese me ta”, ka thënë ajo.
Marrëdhënia mes Rusisë dhe Serbisë, sipas Osmanit bën që kjo e fundit të ketë ende mendësinë e Sllobadan Millosheviq, teksa shtoi se Rusia po e përdor Serbinë si trampolinë për të zhbërë gjithçka ka ndërtuar SHBA në këtë rajon.
“Një Ballkan paqësor nënkupton Evropë paqësore. Kjo nuk është diçka që do Rusia”, ka thënë Osmani, duke shtuar se Ballkani Perëndimor është rajon, në të cilin Rusia dëshiron të zhbëjë gjithçka të ndërtuar nga Shtetet e Bashkuara.
Gjatë bashkëbisedimit me pjesëtarë tjerë të organizimit, Osmani ka theksuar se marrëdhëniet Kosovë-SHBA nuk kanë qenë kurrë më të forta, ndonëse Kosova nuk ishte e ftuar në samitin e presidentit Biden për demokracinë.
Dialogu për normalizim marrëdhëniesh mes Kosovës dhe Serbisë, me ndërmjetësim të BE-së, ka nisur në vitin 2011.
Discussion about this post