Belind Këlliçi denoncoi këtë të premte mosveprimin e Prokurorisë së Posaçme për sekuestro ndaj pasurive të drejtorëve të Erion Veliajt, të arrestuar për procedimin penal të njohur si “5D”.
Në një deklaratë nga selia blu, Këlliçi ripërsëriti denoncimin se firma “5D Konstruksion” (që sipas SPAK kontrollohet nga Mariglen Qato dhe Redi Molla) vijon të paguhet nga Bashkia e Tiranës për një projekt që duhet të ishte përfunduar 5 muaj më parë.
“Në datë 28 Maj, pra vetëm para 3 ditësh, ndërkohë që opozita protestonte në skenën më të madhe të korrupsionit në vend përpara Bashkisë Tiranë, Erion Veliaj kryente pagesën e rradhës për kompaninë 5D. Kolegët e Veliajt në SPAK, vazhdojnë të mbrojnë interesat korruptive të kryebashkiakut në skemën më të madhe dhe të papreçedentë të vjedhjes së 100% të fondeve publike, nëpërmjet kompanisë së 5 drejtorëve të Bashkisë Tiranë. Kjo kompani është rast unik hetimor pasi SPAK jo vetëm që nuk e vendos nën sekuestro, por prestanomen Nestor Muhametllari e lë të lirë pa asnjë masë arresti, që të vazhdojë të përfitojë fonde publike. Por më e rëndë se ky fakt, është lejimi i shitjes së aseteve në palë të treta e më pas zhdukja e parave të bandës 5D. Sot kolegët e Erionit duhet t’i japin llogari qytetarëve se përse kompania 5D nuk është nën sekuestro”, tha ish-deputeti.
Vila e Qatos
Këlliçi u shpreh se “kolegët e Erionit”, duhet t’i japin llogari qytetarëve se përse asetet dhe pasuria e Mariglen Qatos, Redi Mollës dhe të afërmve të tyre nuk është nën sekuestro.
Ai publikoi edhe një foto të një ndërtese për të cilën tha se është vila e blerë nga prindërit pensionistë të Redi Mollës.
“Sot SPAK duhet të na thotë se përse kjo vilë, me vlerë marramendëse në zonën më të lakmuar të Tiranës, e blerë nga 2 prindërit pensionistë të Mollës, në kulmin e pandemisë në korrik të vitit 2020, nuk është nën sekuestro dhe vazhdon biznesin e hotelerisë pa asnjë shqetësim. SPAK nuk mund të veprojë si avokat mbrojtës i parave të korrupsionit në Bashkinë e Tiranës. SPAK duhet të sekuestrojë të gjitha pasuritë e zyrtarëve të korruptuar dhe duhet të ndalojë menjëherë kompaninë 5D që të vazhdojë të përfitojë fonde publike. Altin Dumani duhet ta faktojë me vepra atë ç’ka deklaroi në Komisionin Parlamentar të Ligjeve, se kolegë të tij ai ka vetëm prokurorët e SPAK dhe hetuesit e BKH. Deri më tani, për fat të keq, është faktuar se kolegu i tij vijon të mbetet kryehajduti i Tiranës, pronari faktik i inceneratorit dhe kreu i bandës 5D Erion Veliaj”, përfundoi ai.
Discussion about this post