Ankesat e futbollistit brazilian të Realit të Madridit, Vinicius ndaj gjyqtarët janë bërë të zakonshme në ndeshjet e klubit 14-herë fitues të UEFA Champions League. Ankesa të justifikuara në më shumë se një rast, por e vërteta është se ato kanë filluar t’i vijnë në majë të hundës edhe vetë lojtarëve të Realit.
Kjo mund të shihej në fund të takimit, të dielën e kaluar, kundër Real Betisit. “El Golazo de Gol” transmetoi disa momente të ndeshjes që zhvilloi Vinicius, bëmat e tij në fushë me topin, ndërhyrjet që pësoi dhe gjithashtu sesi ishte objekt i një ofendimi racist nga njëra prej tribunave të Stadiumit “Benito Villamarín”.
“El Golazo de Gol” ka xhiruar edhe atë që ndodhi në fund të ndeshjes, kur Vinicius shkoi te Soto Grado (arbitri i takimit) për t’u ankuar. Ancelotti nuk heziton t’i thotë “vazhdo”, që të shkojë në dhomat e zhveshjes, diçka që Vinicius nuk e bëri dhe Ceballos duhej të afrohej për ta kapur për krahu që të shkonte në dhomën e zhveshjes dhe t’i jepte fund protestave sepse rrezikonte të ndëshkohej me të verdhën e dytë, që do të thoshte karton i kuq edhe pezullim për takimin e rradhës.
Në një sekuencë të videos, të publikuar nga “El Golazo de Gol”, duken qartë, Rüdiger dhe Valverde teksa po e shikonin debatin e brazilianit nga një pjesë tjetër e fushës. Gjermani bëri një gjest duke treguar shqetësimin e tij për ankesat e Vinicius, ndërsa Valverde kthen kokën kur sheh se ai proteston te arbitri.
Me këtë sjellje, duhet thënë se, Vinicius po fillon t’i ngjajë, akoma më shumë, bashkatdhetarit të tij, Neymar. Disa tifozë kanë shkuar deri aty sa ta quajnë “Neymar 2.0”.
Discussion about this post