Viti i ri akademik, Artan Hoxha: Dy kushte për t’u pranuar në auditor, mësimi anglisht në disa degë

Rektori i Universitetit të Tiranës, Artan Hoxha, deklaroi ditën e sotme se, studentët që nuk janë të vaksinuar duhet të paraqesin testin PCR të  48 orëve të fundit, në të kundërt nuk do të pranohen në auditorë.

Sipas tij, deri më tani janë vaksinuar  50% e studentëve të Universitetit të Tiranës dhe pjesa më madhe e tyre janë studentë që prekin për herë të parë auditorët.

 “Ky vit do të fillojë në auditor dhe kemi qendra vaksinimi në çdo universitet, me qëllim që të ecë programi i vaksinimit edhe për ata që nuk kanë arritur të  vaksinohen, si dhe do të dezinfektohen ambientet.

Kemi mbi 50% të studentëve të vaksinuar dhe ne jemi për procesin e ndërgjegjësimit për të vazhduar normalisht mësimin. Sepse ka mbi dy vjet që studentët nuk frekuentojnë auditorët.

Ne kemi konstatuar  dëshirën e studentëve që t’i kthehen auditorit. Ata që vijnë për herë të parë  në auditorë janë më shumë të vaksinuarit. Do shikojmë si do ecë situata sepse ne nuk kemi organe kompetente për të vlerësuar rrezikshmërinë , por duke marrë si shembull e vendet e tjera, mësimi do kryhet fillimisht në auditor”, tha ai.

Ndër të tjera, ai shtoi se ata që nuk kanë bërë vaksinën për arsye shëndetësore duhet të paraqesin testin PCR, në të kundërt  do merren masa të tjera.  Ai tha se, me ardhjen e studenteve nga rrethet do të rritet edhe numri i të vaksinuarve.

Hoxha tha se, risi për këtë vit do të jetë  fakti që disa degë do të zhvillohen anglisht, në mënyrë që të bëhet shkëmbimi i nxënësve me universitete të huaja dhe diploma gjithashtu të njihet nga universiteti me të cilin do të ketë bashkëpunim.

“UT ka hyrë në një proces për modernizimin e programeve të veta, këtë vit akademik një pjesë e mirë e programeve do të zhvillohet në gjuhën angleze, me qëllim që të kemi mundësin që një pjesë të studenteve të rrisim aftësitë e tyre, por edhe shkëmbimin e studentëve me vendet e tjera. Një pjesë e programeve tona të bëhen programe të përbashkëta me shtetet të tjera që diploma të dalë e miratuar nga  universiteti jonë dhe universiteti i huaj”, tha ai, duke shtuar se ky plan do të jetë një plus për të diplomuarit.